ދޮރުން ދޮރަށް ކެމްޕޭނު ކުރުން މިހާރު ހުއްދަތޯ؟ : މުޢިއްޒު
އަންނަ އަހަރު ބޭއްވުމަށް ތައްޔާރުވަމުން އަންނަ ލޯކަލް ކައުންސިލް އިންތިހާބުގައި ވާދަ ކުރާ އެމްޑީޕީގެ ކެންޑިޑޭޓުން ދޮރުން ދޮރަށް ކެމްޕެއިން ކުރައްވާތީވެ، މާލެ ސިޓީ ކައުންސިލަށް ވާދަކުރައްވާ އިދިކޮޅު ކޯލިޝަންގެ ކެންޑިޑޭޓް، ކުރީގެ ހައުސިން މިނިސްޓަރު ޑރ. މުހައްމަދު މުޢިއްޒު ސުވާލު ކުރައްވައިފިއެވެ.
މިކަމާ ބެހޭ ގޮތުން ސުވާލު ކުރައްވާ ޑރ. މުޢިއްޒު މިއަދު ކުރެއްވި ޓްވީޓެއްގައި ވިދާޅުވެފައި ވަނީ ކައުންސިލް އިންތިހާބުގައި ކެންޑިޑޭޓެއްގެ ހައިސިއްޔަތުން މިހާރު ދޮރުން ދޮރަށް ފަދަ ކެމްޕޭނުތައް ކުރުން ހުއްދަ ކުރެއްވީތޯއެވެ. އަދި އެމަނިކުފާނު އެހުންނެވީ އެއީ އަދި މަނާ ކަންކަން ކަމަށް ދެކެވަޑައިގެން ކަމަށް ވެސް ޑރ. މުޢިއްޒު ވިދާޅުވެފައިވެއެވެ.
"އެމްއެމްޑީޕީ ކެނޑިޑޭޓުން ކެމްޕޭނު ކުރަމުންދާތީ ހަމަހަމަ ފުރުސަތު ދެއްވުން އެދެން" ޑރ. މުޢިއްޒު ވިދާޅުވިއެވެ.
ޑރ. މުޢިއްޒުގެ އެޓްވީޓުގައި އެމަނިކުފާނު ވަނީ އިލެކްޝަންސް ކޮމިޝަން (އީސީ) އާއި އެކޮމިޝަންގެ ރައީސް އަހުމަދު ޝަރީފާއި ހެލްތު ޕްރޮޓެކްޝަން އޭޖެންސީ (އެޗްޕީއޭ) ވެސް ޓެގް ކުރައްވާފައެވެ.
މިހާރު އޮތް ގޮތުން ނަމަ ލޯކަލް ކައުންސިލު އިންތިހާބު ބޭއްވުމަށް ހަމަޖެހިފައިވަނީ އަންނަ އަހަރުގެ މާރޗު މަހުގައެވެ. މި އިންތިޚާބާ ދިމާކޮށް ސަރުކާރުގެ އިސް ބޭފުޅުން ރަށްރަށަށް ދަތުރު ކުރައްވާ ކެމްޕޭން ކުރައްވަމުންދާއިރު ރަށް ރަށަށް ދިޔުމުގެ ފުރުސަތު އިދިކޮޅު ކޯލިޝަނަށް ނުލިބޭތީ އިދިކޮޅުން ދަނީ އެކަމުގެ ކަންބޮޑުވުންތައް ފާޅު ކުރަމުންނެވެ.
ކެމްޕޭން ކުރާހިތުން ހޭދެބައިވެފަތޯ ތިހުރީ. ނަމަނަމަ މިގެއަށް ނުވަންނާތި.