ޖެނުއަރީ މަހު ސްޓޫޑެންޓް ލޯނަށް ހުށަހެޅުމުގެ ފުރުސަތު ހުޅުވާލަނީ
އަންނަ އަހަރުގެ ޖެނުއަރީ މަހުގެ ތެރޭގައި ސްޓޫޑެންޓު ލޯނަށް ކުރިމަތިލުމުގެ ފުރުސަތު ހުޅުވާލުމުގެ މަސައްކަތް ކުރަމުން އަންނަ ކަމުގައި ހަޔަރ އެޑިއުކޭޝަން މިނިސްޓަރ ޑރ.އިބްރާޙިމް ހަސަން ވިދާޅުވެއްޖެއެވެ.
"ޕީއެސްއެމް ނިއުސް"އަށް ދެއްވި އިންޓަވިއުއެއްގައި ކޮވިޑް-19 އާ ގުޅިގެން މި އަހަރު ސްޓޫޑެންޓު ލޯނަށް ލުމުގެ ފުރުސަތު ހުޅުވާނުލާ ކަން ފާހަގަކުރައްވައި މިނިސްޓަރު ވިދާޅުވީ ލޯނު ދޭނެ ދާއިރާތައް ކަނޑައެޅުމަށްޓަކައި ސަރުކާރުގެ އިދާރާތަކާއެކު މަޝްވަރާ ކުރަމުން އަންނަކަމަށެވެ.
ނަމަވެސް އަދި މިހާތަނަށް ވަކި ގޮތެއް ނިންމާފައި ނުވާކަން މިނިސްޓަރު ފާހަގަ ކުރެއްވިއެވެ.
އެންމެ ފަހުން ސްޓޫޑެންޓު ލޯނު ދޫކޮށްފައި ވަނީ މި އަހަރުގެ ޖޫން މަހުގެ ތެރޭގައެވެ. އެ ފުރުސަތުގައި 514 ދަރިވަރަކަށް ވަނީ ލޯނު ދޫކޮށްފައެވެ.
މިއަހަރުގެ ފެބްރުއަރީ މަހުގައި މިނިސްޓްރީ އޮފް ހައަރ އެޑިއުކޭޝަނުން ހުޅުވައިލި މަތީ ތަޢުލީމު ލޯނު ސްކީމުގެ ދަށުން 550 ލޯނު ދޫކުރުމަށެވެ. އެލޯނުތަކަށް ގާތްގަނޑަކަށް 1000 ކުދިން ކުރިމަތިލާފައިވެއެވެ.
ލައިސެންސް ހޯދުމަށް ފުރިހަމަކުރާ ކޯސްތައް ހެދުމަށް ލޯނު ދީފައިވަނީ 15 ދަރިވަރަކަށެވެ. އަދި ޑިޕްލޮމާ ފެންވަރުގެ ކޯސްތައް ކިޔެވުމަށް 48 ދަރިވަރަކަށް ލޯނު ދީފައިވާއިރު ފުރަތަމަ ޑިގުރީއަށް ކިޔެވުމަށް 264 ދަރިވަރަކަށް ލޯނު ދޫކޮށްފައިވެއެވެ. އަދި ލޯނު ލިބިފައިވާ ދަރިވަރުންގެ ތެރެއިން މާސްޓާސް ޑިގުރީއަށް ކިޔަވަން ލޯނު ލިބިފައި ވަނީ 160 ދަރިވަރުންނަށެވެ. އަދި ޕީއެޗްޑީއަށް ކިޔަވާ ދަރިވަރުންގެ ތެރެއިން 27 ދަރިވަރުންނަށް ލޯނު ލިބިފައިވެއެވެ.
