ސަސްޕެންޑުކޮށް ބެލި މައްސަލަތައް ޓްރާންސްޕޯޓުގެ ޕީއެސްގެ މައްޗަށް ސާބިތެއް ނުވި!
ޓްރާންސްޕޯޓް އެންޑް ސިވިލް އޭވިއޭޝަންގެ ޕާމަނަންޓް ސެކްރެޓަރީ އަބްދުﷲ ފަޔާޒް ސަސްޕެންޑުކޮށް އޭނާގެ މައްޗަށް ތުހުމަތުކުރި މައްސަލަތައް ސާބިތުނުވާ ކަމަށް ސިވިލް ސާވިސް ކޮމިޝަނުން ނިންމައިފިއެވެ.
ފަޔާޒްގެ މައްޗަށް ކޮށްފައިވާ މަގާމުގެ ނުފޫޒު ބޭނުންކުރުމާއި މިނިސްޓްރީ އަށް މުވައްޒަފުން ނުނެގުން ފަދަ ތުހުމަތުތައް ސިވިލް ސާވިސް ކޮމިޝަނުން ބެލީ މިދިޔަ އޮކްޓޯބަރު މަހުގެ ތެރޭގައި އޭނާ ސަސްޕެންޑް ކޮށްގެންނެވެ. ނަމަވެސް އޮފީހަށް އަލުން ނިކުތުމުގެ ހުއްދަ އެކޮމިޝަނުން މިހާރު ވަނީ ފަޔާޒަށް ދީފައެވެ.
މިތުހުމަތުތަކާ ގުޅިގެން އެކޮމިޝަނުން މިއަދު ނިންމީ ތަހުގީގު ކޮމިޓީއެއް އެކުލަވާލައި ބެލި މައްސަލަތަކުގައި ފަޔާޒް ގާނޫނާއި ގަވާއިދާ ޚިލާފު ކަމެއް ކުރައްވާފައި ނުވާ ކަމަށެވެ.
މިސަރުކާރު އުފެދިގެން އައިފަހުން ޓްރާންސްޕޯޓު މިނިސްޓްރީއަކީ އެތަނަކާ ގުޅޭ ގޮތުން ރައްޔިތުންގެ ޝަކުވާ އެންމެ ބޮޑު މިނިސްޓްރީގެ ގޮތުގައި ފާހަގަ ކޮށްލެވެއެވެ. ނަމަވެސް އެ މިނިސްޓްރީ ހިންގެވުމުގައި ދިމާވާ މައްސަލަތައް ހައްލު ކުރަން ގިނަ މަސައްކަތްތަކެއް ކުރެއްވި ކަމަށް މިނިސްޓަރު އައިޝަތު ނަހުލާ ރައްޔިތުންގެ މަޖިލީހުގެ ކޮމިޓީއެއްގައި ވިދާޅުވެފައިވެއެވެ.
