ކޮވިޑް ވެކްސިން ޖަހާ އެންމެން އަހަރެއް ވަންދެން މޮނީޓާ ކުރާނެ: ޑރ. ނަޒްލާ
ކޮވިޑް ވެކްސިން ޖަހާ މީހުން އެއް އަހަރު ވަންދެން މޮނީޓާ ކުރާނެ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާން ޑރ. ފާތިމަތު ނަޒްލާ ރަފީގު ވިދާޅުވެއްޖެއެވެ.
ޑރ. ނަޒްލާ މިހެން ވިދާޅުވީ ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުންނެވެ. ކޮވިޑް ވެކްސިންގެ ސަބަބުން އެއްވެސް ސައިޑްއިފެކްޓެއް ކުރިމަތިވޭތޯ ބެލުމަށް އެ ވެކްސިން ޖަހާ މީހުން އެއް އަހަރު ވަންދެން މޮނީޓާ ކުރާނެ ކަމަށް ޑރ.ނަޒްލާ ވިދާޅުވިއެވެ. އަދި ވެކްސިން ބޭނުން ކުރާ ހުރިހާ މީހުންނަށް އޭގެ ސަބަބުން އަސަރުތަކެއް ނުކުރާނެ ކަމުގެ 100 ޕަސެންޓް ޔަގީންކަން ނުދެވޭނެ ކަމަށާއި އެންމެ އާދައިގެ ޕެނެޑޯލްގައި ވެސް ސައިޑް އިފެކްޓްސް ހުންނާނެ ކަމަށް ނަޒްލާ ވިދާޅުވިއެވެ.
ނަޒްލާ ވިދާޅުވީ ވެކްސިން ޖަހާ އެހެން ގައުމުތަކުން ވެސް ފާހަގަ ކުރެވޭ ކަންކަން ރާއްޖެއާއެކު ހިއްސާ ކުރަމުންދާނެ ކަމަށެވެ.
"އެހެން ނަމަވެސް އެ ކުދި ކުދި ކަންތައް މޮނީޓާ ކުރެވޭނެ ނިޒާމެއް ގާއިމް ކުރެވޭނެ. ހާއްސަކޮށް މި ވެކްސިނަކީ އާ ވެކްސިނަކަށްވީމަ މުޅި ދުނިޔޭގައި ވެކްސިން ޖަހާ މީހުން އެއް އަހަރު ވަންދެން ފޮލޯއަޕް ކުރެވޭނެ އެމީހުންނަށް އެއްވެސް ކަހަލަ ސައިޑް އިފެކްޓެއް އާދޭތޯ،" ނަޒްލާ ވިދާޅުވިއެވެ.
ނަޒްލާ ވިދާޅުވީ އަދި ވިދާޅުވީ ވެކްސިން ޖަހަން ޝަރުތު ހަމަވާ ހުރިހާ މީހުންނަށް ވެސް ވެކްސިން ދެވިގެންދާނެ ކަމަށެވެ. ވެކްސިނުގެ ސަބަބުން ލިބޭ ފައިދާއަށްވުރެ ގެއްލުން ބޮޑުތޯ ބެލިގެންދާނެ ކަމަށާއި އެހެން ނަމަވެސް ކުދި ކުދި ކަންތައްތައް ބައެއް ފަހަރު ދިމާވުމަކީ އެކަށީގެންވާ ކަމެއް ކަމަށް ވެސް ނަޒްލާ ވިދާޅުވިއެވެ.
