އިސްލާމީ އުއްމަތް ރައީސަށްޓަކައި ފަޚުރުވެރިވޭ: އަނދުން ހުސެއިން
އިސްލާމީ އުއްމަތް ރައީސް އިބްރާހިމް މުހައްމަދު ސޯލިހަށްޓަކައި ފަޚުރުވެރިވާ ކަމަށް އެމްޑީޕީގެ ޕާލަމެންޓްރީ ގްރޫޕްގެ ޑެޕިއުޓީ ލީޑަރު އަދި ރައްޔިތުންގެ މަޖިލިހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ރޭ ވިދާޅުވެއްޖެއެވެ.
ލަންކާގައި މަރުވާ މުސްލިމުންނަށް އިސްލާމީ އުސޫލުތަކާ އެއްގޮތަށް ޖަނާޒާގެ ކަންތައްތައް ފުރިހަމަކުރުމަށް އެ ގައުމުގެ ސަރުކާރަށް ދަތިތަކެއް ކުރިމަތިވެފައިވާ ކަމަށް އަންގާފައިވާ ކަމަށް ވިދާޅުވެ ފޮރިން މިނިސްޓްރީން ނެރުނު ބަޔާނާ ގުޅިގެން އަނދުން ޙުސައިން ކުރެއްވި ޓްވީޓެއްގައި ވިދާޅުވީ ރައީސްގެ ނިންމެވުމުގެ ސަބަބުން އެމަނިކުފާނަކީ ސައްތައިން ސައްތަ އިސްލާމީ ގައުމެއްގެ ވެރިއެއްކަން ސާބިތުކޮށް ދެއްވާފައިވާ ކަމަށެވެ. އަދި ރައީސަށްޓަކައި އިސްލާމީ އުންމަތް ފަހުރުވެރިވާ ކަމަށް އޭނާ ވިދާޅުވިއެވެ.
ރާއްޖޭގައި އިސްލާމީ އުސޫލުތަކާ އެއްގޮތަށް ޖަނާޒާގެ ކަންތައްތައް ހަމަޖައްސައިދިނުމުގައި އެހީތެރިކަން ހޯއްދެވުމަށް، ލަންކާގެ ރައީސް ގޯތާބަޔަ ރާޖަޕަކްސަ، ރައީސް އިބްރާހިމް މުހައްމަދު ސޯލިހަށް ސިޓީފުޅެއް ފޮނުއްވާ ކަމަށް ފޮރިން މިނިސްޓްރީގެ ބަޔާނުގައިވެއެވެ.
އެގޮތުން އިސްލާމީ އުހުވަތްތެރިކަން ދެމެހެއްޓުމުގެ މަޤްސަދުގައި ޝްރީލަންކާގެ ރައްޔިތުންނަށް ފޯރުކޮށްދެވޭ ޚާއްސަ އެހީތެރިކަމެއްގެ ގޮތުގައި ސްރީލަންކާގެ ރައީސްގެ ހުށަހެޅުއްވުމުގައި އެދިވަޑައިގެންފައިވާ ކަންކަން އިންތިޒާމް ކުރެވޭނެ ގޮތެއް ބެލުމަށް ރައީސް ސަރުކާރުގެ ކަމާބެހޭ އިދާރާތަކާ މަޝްވަރާ ކުރައްވަމުން ކަމަށް ވެސް ފޮރިން މިނިސްޓްރީގެ ބަޔާނުގައިވެއެވެ.
