ސަފާރީ ރޭޕް ކޭސް: މައްސަލަ އަލުން އަނބުރާ ޕީޖީއަށް
ހުޅުމާލޭ ފަޅުތެރޭގައި އަޅާފައި އޮތް ސަފާރީއެއްގައި ބިދޭސީ އަންހެނަކަށް ޖިންސީގޯނާކުރި ކަމަށް ތުހުމަތުކުރާ މައްސަލަ އަލުން ޕްރޮސިކިއުޓަ ޖެނެރަލް (ޕީޖީ)ގެ އޮފީހަށް ފޮނުވާފައިވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލަކު މިއަދު ވިދާޅުވީ އެ މައްސަލަ އަލުން ޕީޖީ އަށް ފޮނުވީ ޑިއުޓީ ޕްރޮސިކިއުޝަންގައި މަޝްވަރާކޮށް، ތަހުގީގުގައި އިތުރަށް ފުރިހަމަ ކުރަން ޖެހޭ ކަމަށް އެއްބަސްވެވުނު ކަންކަން ފުރިހަމަ ކުރުމަށް ފަހު ކަމަށެވެ.
ސަފާރީ ރޭޕް ޖިންސީ ގޯނާގެ މައްސަލަ ލިބިފައިވާ ކަމަށް ޕީޖީ އޮފީހުން ވެސް ވަނީ ކަށަވަރު ކޮށްދެއްވާފައެވެ. އެނގިފައިވާ ގޮތުގައި މިމައްސަލައިގައި ދައުވާ ކޮށްފައިވަނީ ތިން މީހެއްގެ މައްޗަށެވެ. ނަމަވެސް އެއީ ކޮންބައެއްކަން ޕީޖީ އޮފީހުން ހާމަ ކޮށްފައެއް ނުވެއެވެ.
މިއީ ރާއްޖޭގައި މަސައްކަތް ކުރި އުމުރުން 27 އަހަރުގެ ކެންޔާ އަންހެނަކަށް ޖިންސީ ގޯނާ ކުރިކަމުގެ މައްސަލައެވެ. މިމައްސަލައިގެ މައުލޫމާތު މިހާތަނަށް ލިބިފައިވާ ގޮތުގައި، އޭނާ އެރޭ ސަފާރީއަށް ދިޔައީ ރައްޓެއްސެއްގެ ދައުވަތަކަށް، ޕާޓީ ކުރާށެވެ. އެސަފާރީގައި ދެ މީހަކު އޭނާއަށް ޖިންސީ ގޯނާ ކުރަން އުޅުނު މައްސަލައިގައި ދެ މީހަކު ފުލުހުންގެ ބެލުމުގެ ދަށަށް ގެންދިޔަ އެވެ. އެކަމަކު، ހައްޔަރު ނުކޮށް ދެ މީހުން ދޫކޮށްލީ ސިޔާސީ ނުފޫޒާ އެކުގައި ކަމަށާއި މުޅި މި މައްސަލައިގައި ވެސް ފުލުހުން އަމަލުކުރި ގޮތާ މެދު ފުލުހުންނަށް ވަނީ ފާޑުކިޔުން އަމާޒުވެފައެވެ.
އެއަންހެންމީހާ އޮންލައިން ނޫސް "މިހާރު" އަށް ދިން އިންޓަވިއުއެއްގައި ބުނެފައި ވަނީ، އޭނާއަށް ގޯނާ ކުރި ދެމީހުން އެއަންހެންމީހާގެ ޖިންސީ ގުނަވަނުގައި އަތްލި ކަމަށެވެ. ސަފާރީގެ ޑެކުގައި ހުރެފައި މޫދަށް ފުންމައިލީ، އުރަމައްޗާއި ފޫކޮޅުގައި އަތްލުމުން، އެފަދަ ކަމެއް އިތުރަށް ކުރިމަތިވިޔަ ނުދޭން ކަމަށް ވެސް އެމީހާ ބުނެފައި ވެއެވެ.
ފަހުން އެއަންހެން މީހާގެ ވަކީލުން ވިދާޅުވެފައި ވަނީ ތަހުގީގަށް މުވައްކިލު މިހާތަނަށް ދީފައިވާ ބަޔާންތަކުގައި، ކެންޔާގެ އަންހެންމީހާ މަރައިލާނެ ކަމަށް ބިރު ދައްކައި އެ ފަރާތުގެ ޖިންސީ ގުނަވަނުގައި ދަމައި ހިފައިގަނެ، ޖިންސީ އަނިޔާކުރި ފަރާތުގެ ޖިންސީ ގުނަވަނުގައި ހިފުމަށް އަންގައި ސަފާރީގައި ހުރި ކޮޓަރިއަކަށް ގަދަކަމުން ގެންދިއުމަށް މަސައްކަތް ކޮށްފައިވާކަން ވެސް ހާމަވާން އޮތް ކަމަށެވެ.
މިމައްސަލައިގެ ތަހުގީގު ކުރިއަށް ދަނިކޮށް އަންހެން މީހާ ވަނީ އެނބުރި ކެންޔާ އަށް ފުރާފައެވެ. އޭނާ ބުނެފައިވަނީ ރާއްޖޭގައި އޭނާއަށް ރައްކާތެރިކަމެއް ނެތް ކަމަށެވެ.
ފުލުހުން ވިދާޅުވެފައި ވަނީ ސަފާރީ ކޭސްގައި ފުލުހުންގެ އަމަލުތަކާ މެދު ތުހުމަތުތައް ކުރިޔަސް އެ މައްސަލައިގެ ތަހުގީގުގައި ނުފޫޒެއް ނެތް ކަމަށެވެ.
