ހައިލަމްގެ ސުވާލެއް ޕީޖީއަށް: ސަފާރީ ރޭޕް ކޭސްއާ ގުޅޭ ނަންތަކަކީ ޤައުމީ ސަލާމަތަށްހުރި ނުރައްކަލެއްތޯ؟
ސަފާރީ ރޭޕް ކޭސްއާ ގުޅުން ހުރި ނަންތަކަކީ ހިއުމަން ރައިޓްސްއާ ގައުމީ ސަލާމަތަށްހުރި ބޮޑު ނުރައްކަލެއްތޯ، ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ޕްރޮސެކިއުޓާ ޖެނެރަލް (ޕީޖީ) އޮފީހަށް އަމާޒުކޮށް ސުވާލު ކުރައްވައިފިއެވެ.
ހުޅުމާލޭ ފަޅުގައި އަޅާފައި އޮތް ސަފާރީއެއްގައި އުމުރުން 27 އަހަރުގެ ކެންޔާ އަންހެނަކަށް ޖިންސީ ގޯނާ ކުރިކަމުގެ ތުހުމަތުގައި ތިން މީހަކަށް ދައުވާ ކޮށްދިނުމަށް އެދި ޕީޖީ އޮފީހަށް ފުލުހުން މިއަދު ވަނީ ފޮނުވާފައެވެ.
މިކަމާމެދު ހައިލަމް މިއަދު ކުރެއްވި ޓްވީޓެއްގައި ސުވާލު ކުރައްވާފައިވަނީ އަދިވެސް އެ "މީހުންގެ" ނަންތައް ހާމަ ކުރެވެން ނެތީތޯ އާއި އެމީހުންގެ ނަންތައް ހާމަ ކުރުމަކީ ހިއުމަން ރައިޓްސްއާ ގައުމީ ސަލާމަތަށްހުރި ބޮޑު ނުރައްކަލެއްތޯއެވެ.
"ދައުވާ ސާބިތުވާ ކަމަށް ކަނޑައަޅާއިރު ވެސް ނަންތައް ހުންނާނީ ސިއްރު ކުރެވިފައި" ހައިލަމް ވިދާޅުވިއެވެ.
ސަފާރީއެއްގައި ކެންޔާ އަންހެނަކަށް ޖިންސީ ގޯނާ ކުރިކަމުގެ މައްސަލައިގެ މައުލޫމާތު މިހާތަނަށް ލިބިފައިވާ ގޮތުގައި، އޭނާ އެރޭ ސަފާރީއަށް ދިޔައީ ރައްޓެއްސެއްގެ ދައުވަތަކަށް، ޕާޓީ ކުރާށެވެ. އެސަފާރީގައި ދެ މީހަކު އޭނާއަށް ޖިންސީ ގޯނާ ކުރަން އުޅުނު މައްސަލައިގައި ދެ މީހަކު ފުލުހުންގެ ބެލުމުގެ ދަށަށް ގެންދިޔައެވެ. އެކަމަކު، ހައްޔަރު ނުކޮށް ދެ މީހުން ދޫކޮށްލީ ސިޔާސީ ނުފޫޒާ އެކުގައި ކަމަށާއި މުޅި މި މައްސަލައިގައި ވެސް ފުލުހުން އަމަލުކުރި ގޮތާ މެދު ފުލުހުންނަށް ވަނީ ފާޑުކިޔުން އަމާޒުވެފައެވެ.
އެއަންހެންމީހާ އޮންލައިން ނޫސް "މިހާރު" އަށް ދިން އިންޓަވިއުއެއްގައި ބުނެފައިވަނީ، އޭނާއަށް ގޯނާ ކުރި ދެމީހުން އެއަންހެންމީހާގެ ޖިންސީ ގުނަވަނުގައި އަތްލި ކަމަށެވެ. ސަފާރީގެ ޑެކުގައި ހުރެފައި މޫދަށް ފުންމައިލީ، އުރަމައްޗާއި ފޫކޮޅުގައި އަތްލުމުން، އެފަދަ ކަމެއް އިތުރަށް ކުރިމަތިވިޔަ ނުދޭން ކަމަށް ވެސް އެމީހާ ބުނެފައިވެއެވެ.
ފަހުން އެއަންހެން މީހާގެ ވަކީލުން ވިދާޅުވެފައި ވަނީ ތަހުގީގަށް މުވައްކިލު މިހާތަނަށް ދީފައިވާ ބަޔާންތަކުގައި، ކެންޔާގެ އަންހެންމީހާ މަރައިލާނެ ކަމަށް ބިރު ދައްކައި އެ ފަރާތުގެ ޖިންސީ ގުނަވަނުގައި ދަމައި ހިފައިގަނެ، ޖިންސީ އަނިޔާކުރި ފަރާތުގެ ޖިންސީ ގުނަވަނުގައި ހިފުމަށް އަންގައި ސަފާރީގައި ހުރި ކޮޓަރިއަކަށް ގަދަކަމުން ގެންދިއުމަށް މަސައްކަތް ކޮށްފައިވާ ކަން ވެސް ހާމަވާން އޮތް ކަމަށެވެ.
މިމައްސަލައިގެ ތަހުގީގު ކުރިއަށް ދަނިކޮށް އަންހެންމީހާ ވަނީ އެނބުރި ކެންޔާ އަށް ފުރާފައެވެ. އޭނާ ބުނެފައިވަނީ ރައްޖޭގައި އޭނާއަށް ރައްކާތެރިކަމެއް ނެތް ކަމަށެވެ.
Ads by STO
