ޚަބަރު

ޗަމްޕާ މުހައްމަދު މޫސާގެ އެހީގައި ސިފައިންގެ އެގްޒެކެޓިވް ބްލޮކެއް އިމާރާތްކުރަން ބިންގާއަޅައިފި

ޢާއިޝަތު ނުޒުހާ ، ދެން އޮންލައިން

އެމްއެންޑީއެފް ނޮދަން އޭރިއާ ޅ.މާފިލާފުށީގައި ޗަމްޕާ މުޙައްމަދު މޫސާގެ އެހީތެރިކަމާއެކު އަލަށް އިމާރާތް ކުރާ އެގެޒެކެޓިވް ބުލޮކްގެ ބިންގާ އަޅައިފިއެވެ.

Ads by Sosun Fihaara

މި އިމާރާތުގެ ބިންގާ އެޅުމަށް އެމްއެންޑީއެފް ނޮދަން އޭރިއާ ޅ.މާފިލާފުށީގައި ޑިސެންބަރު 15 ވަނަ ދުވަހު ބޭއްވި ޚާއްޞަ ރަސްމިއްޔާތުގައި އިމާރާތުގެ ބިންގާ އަޅުއްވައިދެއްވީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ އާއި ޗަމްޕާ މުޙައްމަދު މޫސާ އެވެ.

މި ރަސްމިއްޔާތުގައި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފް ވަނީ ޗަމްޕާ މުޙައްމަދު މޫސާއަށް ޝުކުރު އަދާ ކުރައްވައި ވާހަކަފުޅު ދައްކަވާފައެވެ. އެގޮތުން މި ވާހަކަފުޅުގައި ސިފައިންގެ އުމްރާނީ ތަރައްޤީއަށް އަދި ސިފައިންގެ ވެލްފެއާ ކަންކަމަށް އަމިއްލަ ފަރާތްތަކުން ވެދެއްވަމުން ގެންދަވާ ދީލަތި އެހީތެރިކަން ފާހަގަކޮށް، އެ ފަރާތްތަކަށް ޝުކުރު އަދާ ކުރެއްވިއެވެ.

އަދި ސިފައިންގެ އެކިއެކި ކަންކަމަށް ޗަމްޕާ މުޙައްމަދު މޫސާ، ވެދެއްވަމުން ގެންދަވާ އެހީތެރިކަން ފާހަގަ ކުރައްވައި އެންމެހާ ސިފައިންގެ ނަމުގައި ޗަމްޕާ މުޙައްމަދު މޫސާއަށް ޝުކުރު އަދާ ކުރައްވާފައިވެއެވެ.

ޅ. މާފިލާފުށީގައި އަޅާ މި އިމާރާތުގެ ހުރިހާ މަސައްކަތެއް ކޮށްދެއްވުމަށް ނިންމަވާފައި ވަނީ ޗަމްޕާ މުޙައްމަދު މޫސާ ގެ ދީލަތި އެހީތެރިކަމާއެކުގައެވެ. މި އެގްޒެކެޓިވް ބްލޮކްގައި ހިމެނެނީ 6 ކޮޓަރިއެވެ.

މި އިމާރާތުގެ ބިންގާއެޅުމަށް އެމްއެންޑީއެފް ނޮދަން އޭރިއާ ޅ.މާފިލާފުށީގައި ބޭއްވި ރަސްމިއްޔާތުގައި ޑިފެންސް މިނިސްޓަރުގެ އިތުރުން ޗަމްޕާ މުޙައްމަދު މޫސާ އާއި އެމްއެންޑީއެފްގެ ބައެއް ޖެނެރަލް އޮފިސަރުންނާއި ނޮދަން އޭރިއާގެ ކޮމާންޑަރ ކާނަލް އިސްމާޢީލް ޝަރީފް ބައިވެރިވެލެއްވިއެވެ.

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!