72 ކިލޯގެ މަސްތުވާތަކެތީގެ މައްސަލަ: އިސްކޮށް އުޅުނު އެކަކުގެ ބަންދުގެ މުއްދަތު އިތުރުކޮށްފި
ރާއްޖެއަށް 72 ކިލޯއަށްވުރެ ގިނަ މަސްތުވާތަކެތި އެތެރެ ކުރަން އުޅުނު މައްސަލައިގައި ހައްޔަރު ކުރި މީހުންގެ ތެރެއިން އެންމެ އިސްކޮށް އުޅުނު އެކެއްގެ ބަންދުގެ މުއްދަތު އިތުރު ކޮށްފިއެވެ.
މިކަމާ ގުޅޭގޮތުން ފުލުހުން ވިދާޅުވީ "މަސް ޖަރީ" ނަމަކަށް ކިޔާ ކަންނެލި ދޯންޏެއްގައި ރާއްޖެއަށް މަސްތުވާތަކެތި އެތެރެ ކުރުމުގައި އުޅުނު ކަމަށް ތުހުމަތު ކުރެވޭ ހަތަރު މީހެއްގެ ބަންދުގެ މުއްދަތު އިތުރު ކޮށްފައިވާ ކަމަށާއި ދެން ތިބި ހަ މީހުންގެ ބަންދުގެ މުއްދަތު އަދި ހަމަ ނުވާ ކަމަށެވެ.
ބަންދުގެ މުއްދަތު އިތުރުކުރި މީހުންގެ ތެރެއިން މިމަސްތުވާތަކެތި ރާއްޖެއަށް އެތެރެ ކުރުމުގައި އިސްކޮށް އުޅުނު ކަމަށް ބެލެވޭ ރ. އިނގުރައިދޫ، އެލެސްކާ، މުހައްމަދު ވިސާމް ހިމެނެއެވެ. އޭނާގެ އިތުރުން އެ މައްސަލައިގައި ދެން އިސްކޮށް އުޅެނީ ސ. ހުޅުދޫ، ދޭލިޔާގެ، އިރުފާން ތަގިއްޔުއެވެ.
މައުލޫމާތު ލިބިފައިވާ ގޮތުގައި "މަސް ޖަރީ" އަކީ މިމައްސަަލައިގައި ހައްޔަރު ކޮށްފައިވާ ވިސާމްގެ އާއިލާ މީހެއްގެ ދޯންޏެކެވެ. އޭނާ އުޅެމުން ދަނީ ވެސް ވަރަށް މުއްސަނދި ދިރިއުޅުމެއްގައި ކަމަށް ވެސް މައުލޫމާތު ލިބިފައިވެއެވެ.
ކްރިމިނަލް ކޯޓުން ވިސާމް ގެ ބަންދަށް އެންމެ ފުރަތަމަ ދިނީ ފަސް ދުވަހެވެ. ނަމަވެސް އެމުއްދަތު ހަމަވުމުން ދެވަނަ ފަހަރަށް އޭނާ ކޯޓަށް ހާޒިރު ކުރުމުން ވަނީ ހަތް ދުވަސް އިތުރަށް ދީފައެވެ. ވިސާމް ގެ ބަންދުގެ މުއްދަތު ހަމަވާނީ އަންނަ އާދީއްތަ ދުވަހުއެވެ..
