ޔޫކޭގައި ފެތުރެމުންދާ އާ ވައިރަސްއާ ގުޅިގެން ރާއްޖެއިން ފިޔަވަޅުތައް އިތުރަށް ހަރުދަނާ ކުރާނެ: ނަޒްލާ
އިނގިރޭސިވިލާތުން ފެނުނު ކޮރޯނާ ވައިރަސްގެ އައު ސްޓްރެއިން އާ ގުޅިގެން އެ ޤައުމުގައި ބަލި ކޮންޓްރޯލް ވުމެއްނެތި ފެތުރެމުން ދިއުމާއެކު، އެކަމުން ރާއްޖެއަށް އޮތް ނުރައްކާ ދެނެގަނެ ފިޔަވަޅުތައް ހަރުދަނާ ކުރަމުންދާކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
އެ ސެންޓަރުގެ ތަރުޖަމާނު ޑޮކްޓަރ ނަޒްލާ ރަފީޤު މިހެން ވިދާޅުވެފައި ވަނީ އާދިއްތަ ދުވަހުގެރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުންނެވެ. އިނގިރޭސިވިލާތުން ފެނުނު ކޮރޯނާވައިރަސްގެ އައު ސްޓްރެއިން އާ ގުޅިގެން ރާއްޖެއިން ފިޔަވަޅުތައް އިތުރަށް ހަރުދަނާ ކުރާނެ ކަމަށް ނަޒްލާ ވިދާޅުވިއެވެ. އެގޮތުން މިހާރު ހުރި ފިޔަވަޅުތައް އިތުރަށް ތަންފީޒު ކުރުމާއި، ފިޔަވަޅުތައް ހަރުދަނާ ކުރުމުގެ މަސައްކަތްތައް ކުރަމުންދާކަން ޑރ ނަޒްލާ ފާހަގަ ކުރެއްވިއެވެ.
ނަޒްލާ ރަފީޤު ވިދާޅުވީ، އިނގިރޭސިވިލާތުގައި ފެތުރެމުންދާ ވައިރަސްގެ މައުލޫމާތުތައް ރާއްޖެއިން ވެސް ގާތުން ބަލަމުންދާ ކަމަށެވެ.
"ޔޫކޭގައި ވެސް އައު ސްޓްރެއިންއެއް ފެނިފައިވާ ވާހަކަ އެނގިވަޑައިގަންނަވާނެ، މިކަހަލަ ކަންކަމުގެ މައުލޫމާތު މި ލިބިގެންދަނީ އެ ސްޓްރެއިން ފެތުރެން ފަށާ ފަހުން، އަޅުގަނޑުމެން މި ދަނީ މި ސްޓްރެއިންގެ ކަންކަންވެސް ގާތުން ބަލަމުން، އަދި މިކަމާ ގުޅިގެން އިތުރަށް މިހާރު ހުރި ފިޔަވަޅުތައް އިމްޕްލިމެންޓޭޝަން ރަނގަޅު ކުރުމާ، ފިޔަވަޅުތަކަށް ސަމާލުކަންދީ އެކަންކަން ތަންފީޒު ކުރެވޭ މިންވަރު އިތުރު ކުރުމުގެ މަސައްކަތް ކުރިއަށްދޭ" ނަޒްލާ ވިދާޅުވިއެވެ.
ކޯވިޑްގެ އައު ވައިރަހެއް އިނގިރޭސިވިލާތުން ފެނި އެޤައުމު ވަނީ އަނެއްކާ ވެސް ފުރަ ބަންދުކޮށްފައެވެ. މިހާތަނަށް ފެނުނު ކޯވިޑް ވައިރަހަށްވުރެ މި ވައިރަސް ފެތުރޭ މިންވަރު މާ ފަސޭހަވެފައި ހަލުވިކަމަށް ވެސް ސައިންސްވެރިން ވަނީ ބުނެފައެވެ. އެ ގައުމުން ވަނީ ހަލުވިކަމާ އެކު މި ވައިރަސް ފެތުރެމުން ދާ ކަމަށް ބުނެފައެވެ.
Ads by STO
