ކައިވެނި ކުރުމަށް ރަނގަޅު ތާރީޚަކަށްވުރެ މުހިންމީ ރަނގަޅު ބައިވެރިއެއް ހޯދުން!
އަޅުގަނޑުމެން ތެރޭގައި ރީތި ތާރީޚެއްގައި ކައިވެނި ކުރުމުގެ ސަގާފަތް މިވަނީ ކޮންމެ ވެސް ވަރަކަށް އާލާވާން ފަށައިފައެވެ. އެހެނަސް ކައިވެނި ކުރާނެ ރީތި ތާރީޚެއް ކަނޑައެޅުމުގެ ބަދަލުގައި ކައިވެނި ކުރާނެ ރަނގަޅު ބައިވެރިއެއް އިޚުތިޔާރު ކުރުން އެތައް ގޮތަކުން ވެސް މާ ބުއްދިވެރިއެވެ.
އާދޭހެވެ. އަންހެނަކާ ފިރިހެނަކާ ވާނަމަ ކައިވެނި ކުރެވިދާނެއެވެ. އެހެންނަމަވެސް އެއީ ކިހާ ދުވަހަކަށް ދެމިގެން ދާނެ ކައިވެންޏެއް ކަން އެނގޭނީ ވެސް ފަހެ ކާކަށް ހެއްޔެވެ؟ ކައިވެންޏަކީ ކުޅޭ ކުޅޭ ކުޅިވަރެއް ނޫނެވެ. އެއީ ދެމީހެއްގެ ދިރިއުޅުން އެއްދިރިއުޅުމަކަށް ބަދަލުކޮށް ދެމީހުން އެކުއެކީގައި ލޯބިން އުޅުމަށް ވެވޭ ވައުދުތަކެކެވެ. ދެމީހެއްގެ ދެމެދުގައި އުފެދޭ މާތް ގުޅުމެކެވެ.
ވީއިރު ކައިވެނި ކުރާނެ ރަނގަޅު ތާރީޚަކީ ފަހުން ވެސް ހޯދިދާނެ އެއްޗެކެވެ. ނަމަވެސް ކައިވެނި ކުރާނެ ހެޔޮލަފާ ބައިވެރިއެއް ހޯދުމަކީ ފަސޭހަ ކަމެއް ވެސް ނޫނެވެ. ކޮންމެ މީހަކު ވެސް މިހާރު ވިސްނަނީ ދިރިއުޅުމެއް ފަށާއިރު، ކައިވެނި ކުރާނެ “ސަޅި” ތާރީޚަކާއި، ސިފަ ރީތި ބައިވެރިއެކެވެ.
އެ އިޚުތިޔާރު ކުރާ ބައިވެރިޔާގެ ކިބައިގައި އެއްވެސް ކަހަލަ ހަރުދަނާ ކަމެއް ނެތް ކަމުގައި ވީނަމަވެސް މެއެވެ. ނަތީޖާއެއްގެ ގޮތުން އެފަދަ ކައިވެނިތަކަށް މާ ގިނަ ދުވަސްތަކެއް ނުވެ ހުއްޓުން އަންނަން މެދުވެރިވެއެވެ. ވިސްނާ ނުލާ ނިންމޭ ނިންމުމަކުން މުޅި ދިރިއުޅުން ހަފުސް ވުމުގެ ފުރުސަތު ފަހި ވެގެން ދެއެވެ.
މާލީ ގޮތުންނާއި އެހެނިހެން ގޮތްގޮތުން ދެމީހުން އެކުގައި ދިރިއުޅުމުގެ ގާބިލިއްޔަތުކަން ހުރުމާއެކު ހަރުދަނާ ސިފަތައް އަށަގެންނެވުމާއި އެކަކު އަނެކަކަށް ދީނަށް ބާރު އެޅުމަކީ ކައިވެނި ކުރާ ދެމީހެއްގެ ކިބައިގައި ހުންނަން ވާނޭ ބައެއް ލާޒިމު ސިފަތަކެވެ. ވީއިރު ތާރީޚަށްވުރެ ކައިވެނި ކުރާނެ ރަނގަޅު ބައިވެރިއެއް ހޯދުން އެތައް ގުނައެއް މުހިންމު ނޫންތޯއެވެ؟
Ads by STO
