ކެންސަރު ޖެހިފަ ކަމަށް ބުނެ ދޮގު ހަދައިގެން ކައިވެންޏަށް ފައިސާ ހޯދި އަންހެނަކު ޖަލަށްލައިފި
ކެންސަރު ޖެހިފައިވާ ކަމަށް ބުނެ ދޮގު ހަދައިގެން ގާތް މީހުންނާއި ހެޔޮ އެދޭ މީހުންގެ ފަރާތުން ފައިސާ ހޯދި އަންހެނަކު ޖަލަށް ލައިފިއެވެ.
އުމުރުން 29 އަހަރުގެ ޓޯނީ ސްޓޭންޑަން ނަމަކަށް ކިޔުނު އިނގިރޭސިވިލާތުގެ އަންހެނަކު ކެންސަރު ޖެހިފައިވާ ކަމަށް ބުނެ ދޮގު ހެދީ އޭނާގެ ދުވަސްވީ ލޯބިވެރިޔާ އާއެކު ފެންވަރު ރަނގަޅު ކައިވެންޏެއް ބާއްވަން ކަމަށް މީީޑިއާ ރިޕޯޓުތަކުން ބުނެއެވެ.
މިދިޔަ އަންގާރަ ދުވަހު ޓޯނީ ޖަލަށް ލާފައިވާއިރު، ރިޕޯޓުތަކުން ބުނެފައިވާ ގޮތުގައި އޭނާ ވަނީ ކެންސަރު ޖެހިފައި ކަމަށް ބުނެ އަމިއްލަ އިސްތަށިގަނޑު ވެސް ބާލާފައެވެ.
"ކެންސަރު ހުރީ އަހަރެން ސިކުނޑިއަށާއި ކަށިތަކަށާއި ހުރިހާ ތާކަށް ފެތުރިފަ" ލޯކަލް މީޑިއާ އަކަށް ކުރިން މައުލޫމާތު ދެމުން ޓޯނީ ބުނެފައިވެއެވެ.
ޓޯނީ ބުނެފައި ވަނީ މަރުވުމުގެ ކުރިން ކައިވެނި ކުރަން ބޭނުންވާ ކަމަށެވެ. އެހެންކަމުން ޖޭމްސް ނަމަކަށް ކިޔާ އުމުރުން 52 އަހަރުގެ ލޯބިވެރިޔާ އާއި ކައިވެނި ކޮށްދިނުމަށް "ގޯ ފަންޑް މީ" ނަމަކަށް ކިޔާ ޗެރިޓީ ޕޭޖަކުން ވެސް ވަނީ ޓޯނީ އަށް އެހީވުމަަށް މަސައްކަތް ކޮށްދީފައެވެ. ރިޕޯޓުތަކުން ބުނާ ގޮތުގައި ޓޯނީ ގެ ގާތް މީހުންނާއި ހެޔޮ އެދޭ އެހެން ފަރާތްތައް މެދުވެރިވެގެން ޖުމްލަ 8،500 ޔޫރޯ ޓޯނީ އަށް ހޯދައިދީފައި ވެއެވެ.
ރިޕޯޓުތަކުން ބުނާ ގޮތުގައި ޓޯނީ ބުނީ އޭނާއަށް ޖެހިފައިވަނީ ކުރިމަތީފަރާތުގެ ކެންސަރު ކަމަށާއި އޭނާ ހުރީ ނުރައްކާ ހާލުގައި ކަމަށެވެ.
އޭގެ އިތުރުން ޓޯނީ ބުނީ އޭނަގެ ކައިވެނީގައި އޭނަގެ ބައްޕަ ޑެރެކް ވެސް ބައިވެރިވުމަށް އެދޭ ކަމަށެވެ. ހަގީގަތުގައި ވެސް ކެންސަރާ ހަނގުރާމަ ކުރަމުންދިޔަ ޑެރެކް ވަނީ އެދުވަހުގެ ކުރިން މަރުވެފައެވެ. ނަމަވެސް ޓޯނީގެ ކައިވެނީގައި ޑެރެކް ގެ ވީޑިއޯ އެއް ދައްކާލާ، އެންމެންނަށް ވެސް ފުން އަސަރުތަކެއް ވަނީ ކުރުވާފައެވެ.
ޓޯނީ އަށް ކެންސަރު ޖެހިފައިވާ ކަމަށް އޭނާ އެންމެ ފުރަތަމަ ބުނެފައިވަނީ 2017 ވަނަ އަހަރުގައެވެ. އެކިއެކި މީޑިއާ ތަކަށް އިންޓަވިއު ދެމުން، މިއަހަރުގެ ޖެނުއަރީ މަހު ޓޯނީ ބުނެފައި ވަނީ އޭނާގެ ގުނަވަންތައް ވެސް ގިރިގެން ފައިބަން ފަށާފައިވާ ކަމަށާއި ދުނިޔޭގައި ހުންނަން ލިބިފައިވަނީ އެންމެ ދެ މަސް ދުވަސް ކަމަށެވެ. ޓޯނީ މަރުވެއްޖެ ކަމަށް ވެސް އޭގެ ފަހުން އޭނަގެ ފޭސްބުކް ޕޭޖުގައި ޖަހާފައިވެއެވެ. ފަހުން އޭނަ ބުނީ އޭނާގެ އައިޑީ ހެކްވީ ކަމަށެވެ.
ޓޯނީއާމެދު އެންމެ ފުރަތަމަ ޝައްކުވީ އޭނަގެ އެންމެ ގާތް އެއް އެކުވެރިއެއް ކަމަށްވާ އޭޝްލީ (33 އ.) އަށެެވެ. އޭޝްލީ ބުނީ އޭނާގެ ހިތުގައި ޝައްކު އުފެދުނީ މިއަހަރު ޓޯނީ އަށް ކޮވިޑް-19 ޖެހިފައިވާ ކަމަށް ބުނުމުންނެވެ. އޭނާ ބުނީ އެފަދަ ބަލިތަކެއް ޖެހިފައި ހުންނަ މީހަކާ އަޅާބަލާފައި ޓޯނީ ހުރީ ވަރަށް ރަނގަޅު ސިއްހަތެއްގައި ކަމަށެވެ.
ޓޯނީއާ ދެކޮޅަށް މައްސަލަ ޖައްސާ، ކޯޓުން އޭނާއާ ސުވާލު ކުރުމުން ޓޯނީ ވަނީ ހެދި ހުރިހާ ދޮގަކަށް އެއްބަސް ވެފައެވެ. އަދި އޭނާއަށް ވަނީ 5 މަސް ދުވަހުގެ ޖަލު ހުކުމެއް އިއްވާފައެވެ.
Ads by STO
