ލޯބިވުމަކީ ކުށަކަށްވާނަމަ އެކުށް ނުކުރާ ހަމަ އެކަކު ވެސް ނުހުންނާނެއެވެ.
ދިރިއުޅުމުގައި ކޮންމެ މީހަކަށް ވެސް އެންމެ މުހިންމު އެކައްޗަކީ ލޯބި ކަން ޔަގީނެވެ.މި ދުނިޔޭގައި މީހަކު ދެކެ ލޯބި ނުވާ ހަމަ އެކަކު ވެސް ނޫޅޭނެއެވެ. ކޮންމެ މީހަކަށް ވެސް ދިރިއުޅުމުގެ ކޮންމެވެސް ހިސާބަކުން ކޮންމެވެސް މީހަކު ދެކެ ލޯބި ވެވޭނެއެވެ. އާނއެކެވެ. މި ކިޔާ އިޝްގީ ލޯބީގައި ކޮންމެ މީހަކު ވެސް ޖެހޭނެ ކަން ޔަގީނެވެ.
ވަރަށް ގިނައިން ދެކެވޭ ވާހަކައެކެވެ. ކުރެވޭ ސުވާލެކެވެ. ލޯބި ވުމަކީ ކުށެއް ބާވައެވެ. ނުވަތަ ލޯބިވެވުމަކީ ކުށެއް ބާވައެވެ. މި ސުވާލު ކުރެވޭ އެތައް ހާލަތެއް އާދެއެވެ. ތިމާ ލޯބިވާ މީހާ ތިމާއަށް ކުށަކާ ނުލާ އެތަކެއް ސަޒާތަކެއް ދެމުން ގެންދާނަމަ ތިބާގެ ހިތަށް މި ސުވާލު އަރާފާނެއެވެ. ތިބާ ލޯބިވާ މީހާ ތިބާއަށް އެއްވެސް އަޅާލުމެއް ނުބަހައްޓާނަމަ ވެސް ތިބާއަށް މިފަދަ އެއްޗެހި ހިތަށް އަރާފާނެއެވެ. އަމިއްލަ ނަފްސު ކުށްވެރި ކުރެވިދާނެއެވެ.
ކޮންމެ މީހަކުވެސް ލޯބީގެ ގޮތުން މީހަކާ ގުޅެނީ ވަރަށް ގިނަގުނަ އުއްމީދުތަކާ އެކުގައެވެ. ނުހަނު ލޯބިން އެކުގައި އުޅެން އަޒުމު ކަނޑައަަޅައިގެންނެވެ. ދުވަހަކުވެސް ވަކިނުވާން އެކަކު އަނެކަކަށް ވައުދުތަކާއި އަހުދުތައް ވަމުންނެވެ. ނަމަވެސް ގިނަ ފަހަރަށް އެކުގައި އުޅެން ފަށާއިރަށް މައްސަލަތައް ޖެހެން ފަށަނީއެވެ.
ގިނަ ފަހަރަށް ވާ ގޮތަކީ ކޮންމެވެސް އެކަކު އަނެކާއަށް އޮޅުވާލަައި ފަރުދާގެ ފުރަގަހުގައި އެތައް ކަމެއް ކުރަނީއެވެ. ލޯބިން ގުރުބާންވާން ތައްޔާރަށް ހުރި ލޯބިވެރިޔާގެ ލޯބީގެ އެއްވެސް އަގެއް ނެތި ހިތު ހުރިހާ ގޮތެއް ހަދަނީއެވެ. އަނެކާގެ ކުށެއް ނެތިއެވެ. އެހިސާބުން ސުވާލަކީ އަނެކާ ކުރި ކުށަކީ އޭނާ ދެކެ ލޯބިވުން ބާވައެވެ.
ނުހަނު ލޯބިވާ ލޯބިވެރިޔާ ސިއްރުން ފަރުދާގެ ފުރަގަހުގައި ކުރަމުން ދިޔަ ކަންކަން ފަޅާ އެރުމުން ތިބާއަށް ވާނީ ފަހެ ކިހިނެއް ހެއްޔެވެ. ހަމަ ޔަގީނުން ވެސް ދެރަވާނެ ކަން ގައިމެވެ. ސަބަބަކީ ލޯތްބަކީ ރިހުމާއި ތަދު ވެސް އޭގައި ޝާމިލުވާ އެއްޗަކަށް ވާތީއެވެ. ނަމަވެސް ކުށެއް ނެތި ތިބާގެ ހިތުގައި އެކުގައި އުޅެން ވައުދުވީ ލޯބިވެރިޔާ ޅިޔަ އަޅާލުމުން ތިބާ ވެސް “ލޯބި” މަތިން ފޫހި ވާން ފަށަނީއެވެ.
އެކުވެރިޔާއެވެ. ތިޔައީ އަދި ގޯހެކެވެ. ތިބާގެ ލޯބިވެރިޔާ ކުރާ ކަމެއްގެ ސަބަބުން ތިބާގެ އަމިއްލަ ނަފްސު ކުށްވެރި ކުރަން ނުހަދާށެވެ. ތިބާ އޭނާ ދެކެ ލޯބިވުމަކީ ތިބާގެ ބަދުނަސީބު ކަމުގައި ވެސް ނުދެކޭށެވެ. އަދި އެއީ ތިބާއަށް ކުރެވުނު ކުށެއް ކަމުގައި ވެސް ހީނުކުރާށެވެ. ހުރިހާ ކަމެއް ވެސް ވާނީ ރަނގަޅަކަށޭ ކާބަފައިން ބުނެ އުޅޭ ވާހަކަ އަކީ ތެދު ވާހަކައެކެވެ.
ލޯބިވުމަކީ ކުށެއް ނޫނެވެ. ލޯތްބަކީ ކޮންމެ އިންސާނަކު ވެސް ވާނެ އެއްޗެކެވެ. އެކި މީހުން ލޯބިވާނީ އެކި އެއްޗެހި ދެކެއެވެ. އެކި ކަންކަމާއި އެކި މީހުން ދެކެެއެވެ. ނަމަވެސް ލޯބީގެ މާނަ އޮޅުވައެއް ނުލެވޭނެއެވެ. އެއީ ގަސްދުގައި ވާ އެއްޗެއް ނޫނެވެ. ބޭއިހްތިޔާރުގައި ތިބާގެ ހިތުގައި އުފެދޭ އިހްސާސެކެވެ. ލޯބި ވުމަކީ ކުށަކަށް ވާނަމަ އެކުށް ނުކުރާ ހަމަ އެކަކު ވެސް ނުހުންނާނެކަން ދަންނާށެވެ.
