މި ސަރުކާރަށް ކުރެވުނު ރަނގަޅު އެއްކަމެއް ވެސް ނެތް: މުސްތަފާ
މި ސަރުކާރަށް މިހާތަނަށް ރަނގަޅު އެއްވެސް ކަމެއް ކޮށްދެވިފައި ނުވާ ކަމަށް ތިމަރަފުށީ ދާއިރާގެ ކުރީގެ މެންބަރު މުހައްމަދު މުސްތަފާ ވިދާޅުވެއްޖެއެވެ.
ފަހަކަށް އައިސް މި ސަރުކާރަށް ވަރަށް ބޮޑަށް ފާޑު ވިދާޅުވާ ބޭފުޅެއްގެ ގޮތުގައި ފާހަގަވެފައިވާ މުސްތަފާ މިހެން ވިދާޅުވީ މިރޭ ކުރެއްވެވި ޓްވީޓެއްގައެވެ.
މުސްތަފާ ވިދާޅުވީ މި ސަރުކާރުން ވައުދުވެ ވީ ގިނަ ކަންކަން ނުކޮށްދެވޭ ކަމަށެވެ. އެގޮތުން މަސްވެރިންނަށް ހަމައަގުދޭން ބުނުމާއި ކޮރަޕްޝަން ނައްތާލުމަށް ވީ ވައުދުތައް އޭނާ ފާހަގަ ކުރެއްވެވިއެވެ.
“މަސްވެރިންނަށް ހަމައަގު ހޯދައި ދޭން އުޅުނީ ، އެކަމެއްވެސް ނުވި، ކޮރަޕްޝަނޭ ކިޔައިގެން ޒީރޯ ޓޮލެރެންސްގެ ވާހަކަ ދެއްކީ އެކަމެއް ވެސް ނުވި. ދެން ދެއްކީ ހެޔޮ ވެރިކަމެއްގެ ވާހަކަ. އެންމެ ފަހަށް ވެއްޓުނީ ވިޔަފާރިވެރިންގެ އުނގުތެރެއަށް” މުސްތަފާ ވިދާޅުވިއެވެ.
މަސްވެރިންނަށް ހަމައަގު ހޯދައި ނުދޭތީ ގިނަ މަސްވެރިން އަންނަނީ މިދުވަސްވަރު އެކަމާ ނުރުހުން ފާޅުކުރަމުންނެވެ.
