ފުލުހުންގެ އާ ގާނޫނު ތަންފީޒު ކުރުމާ އެކީ ދާހިލީ ހަމަޖެހުން ކަށަވަރު ވާނެ - އިމްރާން
މިއަދު ތަސްދީގު ކުރެވުނު ފުލުހުންގެ ބިލާއެކު ރާއްޖޭގެ ދާހިލީ ހަމަޖެހުން ކަށަވަރު ވެގެން ދާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ދިވެހި ފުލުހުންގެ ހިދުމަތުގެ ބިލް ރައީސް މިއަދު ތަސްދީގު ކުރެއްވުމާ ގުޅިގެން މިނިސްޓަރު އިމްރާން ކުރެއްވި ޓްވީޓުގައި ވިދާޅުވީ ފުލުހުންގެ ބިލަށް އަމަލު ކުރަން ފެށުމާއެކު ދިވެހި ރާއްޖޭގެ ދާޚިލީ ހަމަޖެހުން ގާއިމްކޮށް، ރައްޔިތުންގެ ސަލާމަތާ ރައްކާތެރިކަން ކަށަވަރު ކުރުމަށް ފުލުހުންގެ ހިދުމަތަށް ގެންނަން ޖެހޭ ބަދަލުތައް އަންނާނެ ކަމަށެވެ.
އަދި މިއީ ދިވެހި ފުލުހުންގެ ހިދުމަތް ތަރައްގީ ކުރަން ކުރެވުނު ވަރަށް މުހިންމު މަސައްކަތެއްގެ ގޮތުގައި މިނިސްޓަރު ފާހަގަ ކުރެއްވިއެވެ.
މިބިލު ރައީސް އިބްރާހިމް މުޙައްމަދު ޞާލިޙް ތަސްދީޤު ކުރެއްވުމާއެކު ފުލުހުންގެ ޚިދުމަތްތަކަށް ބޮޑެތި ބަދަލުތަކެއް އަންނާނެއެވެ.
އެގޮތުން ޕޮލިސް ބޯޑް އެކުލަވާލާތާ ހަތަރު މަސް ދުވަހުގެ ތެރޭގައި ޕޮލިސް ކޮމިޝަނަރު ފިޔަވާ ސުޕްރިޓެންޓެންޑުން ފެށިގެން މަތީގެ ރޭންކުތަކުގައި ތިއްބެވި ފުލުހުންގެ އޮފިސަރުންގެ ތެރެއިން އެކި ތުހުމަތުތައް ކުރެވޭ އޮފިސަރުންގެ މައްސަލަ ބޯޑުން ބަލައި އެ ފަރާތްތައް މަގާމުގައި ބޭތިއްބުމާމެދު އެ ބޯޑުން ގޮތެއް ނިންމަން ޖެހޭ ގޮތަށް ބަދަލު ކުރުން ފަދަ ބޮޑެތި ބަދަލުތަކެއް ވަނީ ގެނެސްފައެވެ.
ދިވެހި ފުލުހުންގެ ހިދުމަތުގެ ބިލް ތަސްދީގު ކުރިއިރު މި ބިލާމެދު އިދިކޮޅު ޕާޓީތަކުން ވަނީ ކަންބޮޑުވުން ފާޅުކޮށްފައެވެ.
