މަސްދޯނި ހައިކެޖް ކުރި މައްސަލައިގައި 26 މީހަކަށް ދައުވާ ކޮށްފި
ލ. ވަޑިނޮޅު ކައިރީ އެން ހިފަން އުޅެނިކޮށް ތޫނު ހަތިޔާރާއެކު "ފަސްކުރި" ނަމަކަށް ކިޔާ މަސް ދޯންޏަށް ބަޔަކު އެރި މައްސަލައާ ގުޅިގެން 26 މީހަކަށް ދައުވާކޮށް ލ. ގަން މެޖިސްޓްރޭޓް ކޯޓަށް މައްސަލަ ހުށަހަޅައިފި އެވެ.
ތޫނު ހަތިޔާރާއެކު "ފަސްކުރި" ދޯންޏަށް ބަޔަކު އަރާފައި ވަނީ މިއަހަރުގެ އޮކްޓޯބަރު މަހުގެ 26 ވަނަ ދުވަހުގައެވެ.
އެމީހުންގެ މައްޗަށް އުފުލާފައި ވަނީ ބިރުދެއްކުމުގެ ދައުވާކަމަށް ޕްރޮސެކިއުޓާ ޖެނެރަލް އޮފީހުގެ މީޑިއާ އޮފިޝަލް އަހްމަދު ޝަފީއު މައުލޫމާތު ދެއްވާފައި ވެއެވެ.
އެނގިފައިވާ ގޮތުގައި އެދައުވާ ކޯޓަށް ހުށަހަޅާފައި ވަނީ މިމަހުގެ 17 ވަނަ ދުވަހުގައެވެ.
ލ. ވަޑިނޮޅު ކައިރީ އެން ހިފަން އުޅެނިކޮށް ތޫނު ހަތިޔާރާއެކު "ފަސްކުރި" ނަމަކަށް ކިޔާ މަސް ދޯންޏަށް ބަޔަކު އެރި މައްސަލައާ ގުޅިގެން ޖުމްލަ 16 މީހަކު ހައްޔަރު ކުރި ކަމަށާއި ނަމަވެސް އެ އެންމެން ވެސް ކޯޓުން ދޫކޮށްލާފައިވާ ކަމަށް ފުލުހުން ވަނީ މީގެ ކުރިން ވިދާޅުވެފައެވެ.
"ފަސްކުރި" ދޯންޏަކީ މީގެ ދެ އަހަރު ކުރިން ލ.ގަމު މީހަކު ޔޮޓް ޓުއާސްއަށް 7 މިލިއަން ރުފިޔާއަށް ވިއްކާފައިވާ ދޯންޏެކެވެ.
އެ ދޯނީ ވިއްކި މީހާ ބުނެފައިވަނީ ލ. އަތޮޅަށް ދޯނި ވަނުމުން ސުލްހަވެރިކަމާ އެކު ދޯންޏަށް އަރައި، ދޯންޏާއި ހަވާލުވެފައިވާ ކަމަށެވެ. އަދި ދޯނި ހައިޖެކް ނުކުރާ ކަމަށް ވެސް އޭނާ ބުނެއެވެ.
ނަމަވެސް ދޯނީގެ ފަޅުވެރިން ވަނީ އެވާހަކަ ދޮގު ކޮށްފައެވެ. ދޯނީގެ ފަޅުވެރިން ބުނީ ގާތްގަޑަކަށް 30 މީހުންގެ ބޮޑު ގްރޫޕަކުން ދޯންޏަށް އެރީ ތޫނު ހަތިޔާރާއި އެކު ކަމަށެވެ. އަދި އެއީ ބިރުވެރި ވަގުތުކޮޅެއް ކަމަށް ފަޅުވެރިން ބުނެއެވެ.
