ކޮވިޑް-19 އަށް ވެކްސިނެއް ބޭނުން ކުރުމުގެ ހުއްދަ ޑަބްލިޔުއެޗްއޯއިން ފުރަތަމަ ފަހަރަށް ދީފި
މުޅި ދުނިޔެއަށް ފެތުރިފައިވާ ކޮރޯނާ ވައިރަސް ނުވަތަ ކޮވިޑް-19 އިން ރައްކާތެރިވުމުގެ ގޮތުން ބޭނުން ކުރާނެ ވެކްސިނެއްގެ ގޮތުގައި ދުނިޔޭގެ ސިއްޙަތު ޖަމްއިއްޔާ (ޑަބްލިޔުއެޗްއޯ) އިން ދިން އެންމެ ފުރަތަމަ ހުއްދަ ފައިޒާ/ބަޔޯއެންޓެކް ވެކްސިނަށް ދީފިއެވެ.
ދުނިޔޭގެ ސިއްޙަތު ޖަމްއިއްޔާއިން މިކަން އިއުލާނު ކުރައްވާފައި ވަނީ 2020 ވަނަ އަހަރު ނިމުމާ ގާތްވެފައި ވަނިކޮށް 31 ޑިސެމްބަރު ވީ ބުރާސްފަތި ދުވަހުއެވެ.
ފައިޒާ/ބަޔޯއެންޓެކް ވެކްސިން ބޭނުން ކުރުމަށް ކޮންމެ ޤައުމަކަށް ވެސް ހުއްދަ ދެވޭއިރު، ޑަބްލިޔުއެޗްއޯ ގެ ފަރާތުން ޔުނިސެފް އާއި ޕޭން-އެމެރިކަން ހެލްތު އޮގަނައިޒޭޝަނުން މިވެކްސިން ގަނެ، ބަހާލުމުގެ ހުއްދަވެސް ދޭން ނިންމާފައިވާ ކަމަށް ބޭރުގެ ރިޕޯޓުތަކުން ބުނެއެވެ.
"މިއީ މުޅި ދުނިޔޭގެ މަސްރަހަށް ބަލާއިރު ކޮވިޑް-19 ވެކްސިން ފަސޭހައިން މަގުފަހި ކޮށްދިނުމަށް އެޅުނު ރަނގަޅު ފިޔަވަޅަކަށް ވެގެންދާނެ" އެސިސްޓަންޓް ޑިރެކްޓަރ ޖެނެރަލް ޑރ. މޭރީއޭންޖެލާ ޝިމާއޯ ބުންޏެވެ.
މޭރީއޭންޖެލާ ބުނެފައި ވަނީ ހުރިހާ ޤައުމުތަކަށް ވެސް ވެކްސިން ފޯރުކޮށްދިނުމަށް މަސައްކަތް ކުރެވެމުން ދާއިރު، ބައެއް ޤައުމުތަކަށް ވަކިން ޚާއްސަ އިސްކަމެއް ދީފައިވާ ކަމަށެވެ.
މޭރިއޭންޖެލާ ބުނެފައިވާ ގޮތުގައި، ކޮވިޑް ވެކްސިނުން ރައްކާތެރިވުމުގެ ގޮތުން މިހާރު އުފައްދާފައިވާ އެހެން ވެކްސިން ތަކަށް ވެސް ޑަބްލިޔުއެޗްއޯ އިން ވަރަށް އަވަހަށް ހުއްދަ ދިނުމުގެ މަސައްކަތް ކުރަމުން އަންނަ ކަމަށެވެ.
