ލޯކަލް ކައުންސިލު އިންތިހާބު މާރިޗު 6 ގައި ނުބޭއްވޭނެ : އިލެކްޝަންސް
ސިއްޙީ ކުއްލި ނުރައްކަލުގެ ހާލަތުގެ މުއްދަތު އަންނަ ފެބްރުއަރީ މަހުގެ 3 ވަނަ ދުވަހަށް އިތުރު ކުރުމާ ގުޅިގެން ލޯކަލް ކައުންސިލް އިންތިހާބު މާރިޗް ހައެއްގައި ނުބޭއްވޭނެ ކަމަށް އިލެކްޝަން ކޮމިޝަނުން ވިދާޅުވެއްޖެ އެވެ.
މިދިޔަ އަހަރުގެ މާރޗް މަހުގެ 12 ވަނަ ދުވަހުން ފެށިގެން ޑިޕާޓްމަންޓް އޮފް ޕަބްލިކް ހެލްތުން އިއުލާނު ކޮށްފައިވާ ޢާއްމު ސިއްޙަތުގެ ކުއްލި ނުރައްކަލުގެ ހާލަތުގެ މުއްދަތު އަންނަ މަހުގެ 3ވަނަ ދުވަހާ ހަމައަށް އަނެއްކާވެސް ދަމަހައްޓަން ނިންމިކަން އިއުލާނު ކުރީ މިއަދު އެވެ.
އޮންލައިން ނޫސް "ވަގުތު" އަށް މައުލޫމާތު ދެއްވަމުން އިލެކްޝަންސް ކޮމިޝަންގެ ރައީސް އަހުމަދު ޝަރީފު ވިދާޅުވީ، ޢާއްމު ސިއްޙަތުގެ ކުއްލި ނުރައްކަލުގެ ހާލަތުގެ މުއްދަތު އިތުރު ކުރުމާއި ގުޅިގެން މިއަހަރުގެ މާރިޗު މަހުގެ 6 ވަނަ ދުވަހު ބޭއްވުމަށް ކުރިން ހަމަޖެހުނު ލޯކަލް ކައުންސިލު އިންތިހާބު، އެދުވަހު ނުބޭއްވޭނެ ކަމަށެވެ.
"ފެބްރުއަރީ ތިނަކާ ހަމައަަށް ގޮސްފި ކަމުގައި ވަންޏާމުން، އަޅުގަނޑުމެން އިއުލާނުކޮށްފައި އޮތް ހައެއް މާރޗްގައި އިންތިހާބު ނުބޭއްވޭނެ، އިންތިހާބުގައި ކުރަން ޖެހޭ (ކަންކަމާއި)، އަދި އޮންނަ ތާރީހަށް ބަލާފައި، ރީރަޖިސްޓްރޭޝަންއާއި ކަންކަން ބެލުމަށް ފަހުގައި އެއްމަސް ތެރޭގައި ނުބޭއްވޭނެ އިންތިހާބު" އެނޫހަށް މައުލޫމާތު ދެއްވަމުން އީސީ ޝަރީފު ވިދާޅުވެފައިވެއެވެ.
މިކަމާއި ގުޅޭގޮތުން އިތުރު ނިންމުންތަށް ނިންމާނީ ބުދަ ދުވަހު ބާއްވާ ބައްދަލުވުމުގައި ކަމަށް ވެސް ޝަރީފު ވިދާޅުވިއެވެ.
