އެމްޕީއެލްގެ މުވައްޒަފަކީ ކޮން ސިޔާސީ ޕާޓީއެއްގެ ކޮން ފިކުރެއްގެ މީހެއްތޯ ކުންފުނިން ނުބަލާނެ: ޝާހިދު އަލީ
މޯލްޑިވްސް ޕޯސްޓް ލިމިޓެޑްގައި މަސައްކަތް ކުރައްވާ މުވައްޒަފުންނާ ގުޅުން ހުރި ކަންކަން ކުރެއްވުމުގައި އެމީހަކީ ކޮން ސިޔާސީ ޕާޓީއެއްގެ ކޮން ފިކުރެއްގެ މީހެއްތޯ އެ ކުންފުނިން ނުބަލާނެ ކަމަށް ސީއީސޯ ޝާހިދު އަލީ ވިދާޅުވެއްޖެއެވެ.
"ދެން" އަށް ދެއްވި އިންޓަވިއުއެއްގައި ޝާހިދު ވިދާޅުވީ ކުންފުނީގެ ކޮންމެ މުވައްޒަފަކުވެސް އެމުވައްޒަފަކު ކުރާ މަސައްކަތް އެންމެ ރަނގަޅަށް "ޑެލިވަރ" ކުރާ މުވައްޒަފަކަށް ވުމަކީ މުހިންމު ކަމެއް ކަމަށެވެ.
" އެމީހާއަކީ ކޮން ސިޔާސީ ފިކުރެއްތޯ ކޮން ސިޔާސީ ޕާޓީއެއްތޯ ކުންފުނިން ބަލާކަށް ނުޖެހޭ" ޝާހިދު
ތަނުގެ މުވައްޒަފުންގެ ފިކުރާއި ސިޔާސީ ޕާޓީއަކީ އެމްޕީއެލްއިން ބަލާނެ ކަމެއް ނޫންކަން ފާހަގަ ކުރައްވަމުން ޝާހިދު ވިދާޅުވީ އެހެން ނަމަވެސް ކުންފުނީގައި ކޮންމެ މުވައްޒަފަކަށް ވެސް އަމަލު ކުރަން ޖެހޭ ކޯޑް އޮފް ކޮންޑަކްޓެއް އޮންނަ ކަމަށެވެ. އަދި ކުންފުނީގެ މުވައްޒަފުން ބަހައްޓަން ޖެހޭ އަޚްލާގީ މިންގަނޑެއް އޮންނަ ކަމުގައި ވެސް ޝާހިދު ފާހަގަ ކުރެއްވިއެވެ.
އެ ހުރިހާ ޕޮލިސީ ތަކަކަށް ކުންފުނީގެ ހުރިހާ މުވައްޒަފުން އަމަލު ކުރަން ޖެހޭ ކަމަށް ޝާހިދު ވިދާޅުވިއެވެ. އަދި ކޮންމެ ސިޔާސީ ފިކުރެއްގެ މީހެއް ވިޔަސް އެ މީހެއްގެ ކޯޑް އޮފް ކޮންޑަކްޓާއި ކޯޑް އޮފް އެތިކްސްއާ ޚިލާފުވާ ކަމުގައި ވަނީ ނަމަ އޮންނަ އުސޫލުން ކުންފުނިން ފިޔަވަޅު އަޅާނެ ކަމުގައި ޝާހިދު ވިދާޅުވިއެވެ.
އެގޮތުން އެންމެ ފުރަތަމަ އަނގަ ބަހުން ނަސޭހަތް ދެވޭނެ ކަމަށާއި، ދެވަނަ ފަހަރަށް ލިޔުމުން ނަސޭހަތް ދެވޭނެ ކަމަށާއި ތިން ވަނަ ފަހަރަށް ވެސް ލިޔުމުން ނަސޭހަތް ދެވޭނެ ކަމުގައި ޝާހިދު ފާހަގަ ކުރެއްވިއެވެ. އެއަށްފަހު އިންޒާރަކާއި ފަހުގެ އިންޒާރެއް ދެވޭނެ ކަމުގައި ޝާހިދު ވިދާޅުވިއެވެ. ކޮންމެ ސިޔާސީ ޕާޓީއެއްގެ މީހެއް ވިޔަސް އެމްޕީއެލް އިން އަމަލު ކުރާނީ އެ އުސޫލުގެ މަތިން ކަމުގައި ވެސް ވިދާޅުވިއެވެ.
ޝާހިދު އިތުރަށް ވިދާޅުވީ މީސްމީޑިއާގައި ތިލަވާ ކޭސްތަކުގައި ވެސް ކުންފުނިން އަމަލު ކޮށްފައި ހުންނާނީ އެ އުސޫލުގެ މަތިން ކަމަށެވެ. އަދި ވަޒީފާއިން ވަކި ކުރަނީ އުސޫލުގެ ދަށުން ކަމަށާއި ވަކި ސިޔާސީ ޕާޓީއަކަށް ވެގެން ނޫން ކަމުގައި ޝާހިދު ވިދާޅުވިއެވެ.
"އެމްޕީއެލްގެ ތެރެއިން ވަކި ސިޔާސީ ފިކުރަކަށް ތާއިދު ކުރަން ނުވަތަ ވަކި ސިޔާސީ ޕާޓީއެއްގެ ޖަލްސާއަކަށް ދާން ނުވަތަ ވަކި ސިޔާސީ ޕާޓީއަކަށް ރަޖިސްޓްރީވާން، އެކަހަލަ އެއްވެސް ސިޔާސީ ކަންތައްތަކެއް ކުންފުނި ތެރޭގައި ނޯންނާނެ" ޝާހިދު
ޝާހިދު މިފަދައިން ވިދާޅުވެފައިވާއިރު އެ ކުންފުނީގައި މަސައްކަތް ކުރައްވާ ޕްރޮގްރެސިވް ޕާޓީ އޮފް މޯލްޑިވްސްގެ ކައުންސިލް މެމްބަރެއް ކަމަށްވާ ސުޢޫދާ ޢަބުދުﷲ ، ސިޔާސީ ސަބަބުތަކަށް ޓަކައި ވަޒީފާއިން ވަކިކުރި ވާހަކަތަކެއް ވަނީ ދާދި ފަހުން މީސްމީޑިއާގައި އާންމުވެފައެވެ. ސުއޫދާ އަށް އެމްޕީއެލް އިން ފޮނުވި ޗިޓުގައި ބުނީ އެސިސްޓެންޓް އޮފިސަރުގެ މަގާމުން ވަކިކުރީ ކުންފުނީގެ ޕޮލިސީތަކާ ހިލާފަށް އަމަލު ކުރަމުން ދާތީ ތަކުރާރުކޮށް ނަސޭހަތް ދިނުމުން ވެސް އެ އަމަލުތަކަށް ބަދަލު އައިސްފައި ނުވާތީ ކަމަށެވެ. ނަމަވެސް ، އެކި މީޑިއާތަކަށް ދީފައިވާ އިންޓަވިއުތަކުގައި ސުއޫދާ ވަނީ އެކަން ދޮގުކޮށް އޭނާ ވަކިކުރި ކުރުމަކީ ސިޔާސީ ކަމެއްގެ ގޮތުގައި ސިފަ ކޮށްފައެވެ.
