ރައްޔިތުންގެ މަޖިލިސް ހުޅުވަން ފެބްރުއަރީ 4 ރަސްމީ ބަންދު ދުވަހެއްގެ ގޮތުގައި ކަނޑައަޅައިފި
ރައްޔިތުންގެ މަޖިލިސް މިއަހަރު ހުޅުވަން، ފެބްރުއަރީ މަހުގެ 4 ވަނަ ދުވަސް ރަސްމީ ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ކަނޑައަޅުއްވައިފިއެވެ.
މިކަން އިއުލާނު ކުރައްވަމުން ރައީސް އޮފީހުގެ ތަރުޖަމާނު އިބްރާހިމް ޙޫދް ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ ޖަލްސާތައް މިއަހަރަށް ރަސްމީކޮށް ފައްޓަވައި ދެއްވުމަށްޓަކައި، 4 ފެބްރުއަރީ 2021 ވާ ބުރާސްފަތި ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސް ޞާލިޙު ކަނޑައަޅުއްވައިފި ކަމަށެވެ.
ނިމިދިޔަ އަހަރުގެ މަޖިލިސް ޖަލްސާތައް ނިންމާލާ، ޗުއްޓީއަށް ގޮސްފައިވަނީ ޑިސެމްބަރު މަހުގެ 7 ވަނަ ދުވަހުގައެވެ.
ތިންވަނަ ދައުރުގެ ފަހު ޖަލްސާ ނިންމަވާލައްވަމުން އެދައުރުގެ ކުރު ޚުލާސާއެއް އިއްވާލަމުން ނައިބު ރައީސާ އީވާ އަބްދުﷲ ވިދާޅުވީ އެ ދައުރުގައި ޖަލްސާގެ ވަގުތުގައި ޖުމްލަ 89 ގަޑިއިރު، އަދި ކޮމިޓީގައި 330 ގަޑިއިރު މެންބަރުން މަސައްކަތް ކޮށްފައިވާ ކަމަށެވެ.
ނިމިދިޔަ މިދައުރުގެ ތެރޭގައި ޖުމްލަ 15 ބިލެއްގެ މަސައްކަތް ނިންމައި ފާސްކުރެވިފައިވާ ކަން ވެސް މަޖިލިހުގެ ނައިބު ރައީސާ ވަނީ ފާހަގަ ކުރައްވާފައެވެ. އެގޮތުން ތައުލީމުގެ ބިލާއި، ފުލުހުންގެ ހިދުމަތުގެ ބިލާއި، އިންތިގާލީ އިންސާފުގެ ބިލުގެ އިތުރުން ކުޑަކުދިންނަށް މަރުގެ އަދަބު ނުދެވޭ ގޮތަށް މިއަދު ކުޑަކުދިންގެ އަދުލުގެ ގާނޫނަށް ގެނެވެނު އިސްލާހު އީވާ ފާހަގަ ކުރެއްވިއެވެ.
މީގެއިތުރުން ރިޔާސަތުން ހުށަހެޅުނު 8 މައްސަލައަކާ ސަރުކާރުން ހުށަހެޅުނު 8 މައްސަލައެއްގެ އިތުރުން އެހެނިހެން މައްސަލަތަކުގެ ގޮތުގައި އިތުރު 14 މައްސަލައެއް މަޖިލީހުން ނިންމާފައިވާ ކަމަށާއި، މި ދައުރުގައި ސަރުކާރުގެ އެކި ވަޒީރުންނާ ޖުމްލަ 17 ސުވާލެއް ކުރެވިފައިވާ ކަން ވެސް އީވާ ފާހަގަ ކުރެއްވިއެވެ.
