ރީޖަނަލް އެއާޕޯޓްސް ކޮމްޕެނީގެ އެމްޑީ އަކަށް ރިޒްވީ ހަމަޖައްސަނީ
ޤައުމީ އެއާލައިން ހިންގާ އައިލެންޑް އޭވިއޭޝަން އޭވިއޭޝަން ސާވިވަސް (އައިއޭއެސް) ގެ މެނޭޖިން ޑިރެކްޓަރު މުހައްމަދު ރިޒްވީގެ ގާބިލްކަމާ މެދު ފާޑުކިޔުން ބޮޑުވެފައި އޮތް ދަނޑިވަޅުގައި އޭނާ އެ މަގާމުން ވަކިކުރަން ސަރުކާރުން ނިންމައިފި އެވެ.
އައިއޭއެސްގެ އެމްޑީ ކަމުގެ މަގާމުން ރިޒްވީ ވަކިކުރަން ނިންމި ކަމުގައިވިޔަސް، ސަރުކާރުން މިދިޔަ އަހަރު އުފެއްދި ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރުގެ މަގާމު ދިނުމަށް ނިންމާފައިވާ ކަމަށް ވެސް މައުލޫމާތު ލިބެއެވެ.
ސަރުކާރު ހިއްސާވާ ކުންފުނިތަކުގެ މަގާމުތައް ކަނޑައަޅާ ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޑް (ޕީސީބީ) އިން ބުނީ މިދިޔަ އަހަރުގެ ސެޕްޓެމްބަރު މަހު ރައީސް އިބްރާހިމް މުހައްމަދު ޞާލިޙު އުފެއްދެވި ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރުގެ މަގާމަށް ރައީސް އޮފީހުން ނޮމިނޭޓް ކޮށްފައި ވަނީ ރިޒްވީގެ ނަން ކަމަށެވެ. މީގެ އިތުރުން އެ ކުންފުނީގެ ޑިރެކްޓަރުންގެ މަގާމަށް ބޭފުޅުން އައްޔަން ކުރުމުގެ މަސައްކަތްތައް ވެސް ކުރަމުން އަންނަ ކަމަށް ޕީސީބީން ބުނެ އެވެ.
އައިއޭއެސްގެ އެމްޑީގެ މަގާމަށް ރިޒްވީ އައްޔަން ކުރުމާ ހަމައަށް އޭނާ ހުންނެވީ އެ ކުންފުނީގެ ދަށުން ހިންގާ މޯލްޑިވިއަން ހޮލިޑޭސްގެ އެންމެ އިސް ވެރިޔާގެ މަގާމުގައެވެ. ނަމަވެސް އޭނާގެ އެމްޑީ ކަމުގެ ދަށުން އައިއޭއެސްއަށް ބޮޑެތި ގެއްލުންތަކެއް ވަމުން ދިޔަ ކަމަށް، ކުންފުނީގެ ބައެއް ބޭފުޅުންނާއި ފާޑުކިޔާ އެހެން ބައެއް ފަރާތްތަކުން ބުނަމުން ގެންދިޔައެވެ.
މިދިޔަ އަހަރު ކުރިމަތިވި ކޮވިޑް-19 ގެ ބަލިމަޑުކަމުގައި އައިއޭއެސް އިން ބޮޑަށް ބަރޯސާ ވެފައިވަނީ ސަރުކާރުގެ މާލީ އެހީތެރިކަމަށެވެ. އެގޮތުން މޯލްޑިވިއަން އިން ވަނީ ވަރަށް ގިނަ ގޮތްގޮތުން ބޮޑު އެހީތެރިކަމެއް ފޯރު ކޮށްދީފައެވެ.
