ކޮވިޑް19: ކުރީގެ ފަނޑިޔާރު މުޖުތާޒު ފަހުމީ އަވަހާރަވެއްޖެ
ކޮވިޑް-19 އަށް ފައްސިވެ، ހާލުކޮޅު ދެރަވެގެން، ވެންޓިލޭޓަރުގައި ފަރުވާ ދެއްވަމުންދިޔަ ސުޕްރީމް ކޯޓުގެ ކުރީގެ ފަނޑިޔާރު މުޖުތާޒު ފަހުމީ އަވަހާރަވެއްޖެއެވެ.
އެނގިފައިވާ ގޮތުގައި މުޖުތާޒް އަވަހާރަވީ ރޭ ދަންވަރު 2:00 ހާއިރެވެ.
"ދެން" އަށް އެނގިފައިވާ ގޮތުގައި މުޖުތާޒް ކޮވިޑަށް ފައްސިވާކަން އެނގިފައިވަނީ ފަޅުރަށެއްގައި ކަރަންޓީނުގައި ހުންނަވަނިކޮށެވެ. އެމަނިކުފާޏު ފައްސިކަން އެނގިފައިވަނީ މިމަހުގެ 3 ވަނަ ދުވަހުއެވެ.
ބައްޔަށް ފައްސިވުމުން އެމަނިކުފާނު އެންމެ ފުރަތަމަ ބަހައްޓާފައި ހުރީ ލ. ގަމުގައި ހުންނަ ކޮވިޑް ފެސިލީޓީގައެވެ. ނަމަވެސް ހާލުކޮޅު ދެރަވުމުގެ ސަބަބުން އިއްޔެ ހަވީރު ދަރުމަވަންތަ ހޮސްޕިޓަލަށް ބަދަލުކޮށް، ވެންޓިލޭޓަރުގައި ފަރުވާ ދޭން ފެށިކަމަށް ވެސް މައުލޫމާތު ލިބިފައިވެއެވެ.
އުމުރުން 61 އަހަރުގެ މުޖުތާޒް ފަހުމީ އަކީ ފަނޑިޔާރުކަން ވަރަށް ގިނަ ދުވަސް ވަންދެން ކުރައްވާފައިވާ ބޭފުޅެކެވެ. ފަނޑިޔާރުކަމުން ރިޓަޔަރ ކުރައްވާފައިވަނީ 2010 ވަނަ އަހަރުގައެވެ.
މުޖުތާޒް ފަހުމީ އަކީ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ގެ އެންމެ ދޮށީ ބޭބެއެވެ. އެމަނިކުފާނު އަވަހާރަވުމުގެ ޚަބަރު އިމްތިޔާޒް ވަނީ ޓްވިޓާ މެދުވެރިކޮށް، އާންމުންނާއި ހިއްސާ ކުރައްވާފައެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތްލައްވާ، ފާފަ ފުއްސަވާ، ސުވަރުގޭގެ ދާއިމީ ނިއުމަތް މިންވަރު ކޮށްދެއްވާށިއެވެ.އާމީން! އަދި މި ހިތްދަތި ވަގުތުގައި އާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِرَاجِعُون
