ކްރިމިނަލް ކޯޓު ސަރަޙައްދުގައި ޕީޕީއެމް އިން މުޒާހަރާ ކުރަނީ
ކްރިމިނަލް ކޯޓު ސަރަޙައްދުގައި އިދިކޮޅު ޕީޕީއެމް އިން މުޒާހަރާ ކުރަމުން އެބަދެއެވެ.
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ސަޕޯޓަރުން އެސަރަޙައްދުގައި މުޒާހަރާ ކުރަމުން ދަނީ، އެމަނިކުފާނު މިނިވަން ކުރުމަށް ގޮވާލައެވެ.
އެމްއެމްޕީއާރްސީގެ ޚިޔާނާތާ ގުޅިގެން ދައުލަތުން ވަނީ ރައީސް ޔާމީންގެ މައްޗަށް ދެ ދައުވާއެއް ކޮށްފައެވެ. އެއީ މަނީ ލޯންޑަރިންގެ ދައުވާއާއި ރ. ފުއްގިރި ދޫކުރުމުގައި ކުރެވުނު މުއާމަލާތުގައި ރިޝްވަތު ގަބޫލުކުރުމުގެ ދައުވާއެވެ.
މަނީ ލޯންޑަރިންގެ ކުށް ސާބިތުވާ ކަމަށް ކަނޑައަޅާ އެމަނިކުފާނު މިހާރުވެސް ގެންދަވަނީ ފަސް އަހަރާއި ހަ މަސް ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ.
ރައީސް ޔާމީންގެ ސަޕޯޓަރުންނާއި، އިދިކޮޅު ޕީޕީއެމް/ޕީއެންސީއިން ބުނަމުންދަނީ އެމަނިކުފާނަށް ކުރަމުން ދަނީ ނުހައްގު ދައުވާތަކެއް ކަމަށާއި މި ސަރުކާރުން އެމްއެމްޕީއާރުސީގެ ހިޔާނާތް ތަހުގީގު ނުކުރާ ކަމަށެވެ. އަދި ހަމައެކަނި މިސަރުކާރުގެ ބޭނުމަކީ ރައީސް ޔާމީނަށް އަނިޔާ ކުރުން ކަމަށް ވެސް އިދިކޮޅުން ބުނެއެވެ.
