ފޮނަދޫ ކުލަސްޓަރއާ ގުޅިގެން ގަން،ފޮނަދޫގެ ސްކޫލުތައް މާދަމާ ނުހުޅުވާނެ
ގއ.ދެއްވަދޫން ލ.ފޮނަދޫއަށް ދަތުރުކުރި 4 މީހަކު ކޮވިޑަށް ފައްސިވުމާ ގުޅިގެން ލ.ގަން އަދި ފޮނަދޫގެ ސުކޫލުތައް މާދަމާ ނުހުޅުވާ ގޮތަށް ހަމަޖައްސައިފިއެވެ.
"ދެން" އަށް މައުލޫމާތު ދެއްވަމުން ގަމު ހަމަދު ސްކޫލްގެ ޕްރިންސިޕަލު ޝައުކަތު ލަތީފު އާއި ލާމު އަތޮޅު ތައުލީމީ މަރުކަޒުގެ ޕްރިންސިޕަލް އަބްދުﷲ ނަސީޙް ވިދާޅުވީ، ކޮވިޑަށް ފައްސި ކޭސް ތަކެއް ފެނުމާ ގުޅިގެން ކޮންޓެކްޓް ޓްރޭސިންގ ހަދާ ނިމެންދެން ސްކޫލްތަކުގެ ކިޔެވުން ބަންދު ކަމަށެވެެ.
"ފައްސި ވެފައިވާ ކޭސްތަކެއް ފެނުމާއި ގުޅިގެން އެޑިއުކޭޝަނުން ވަނީ ކޮންޓެކްޓް ޓްރޭސިންގެ މަސައްކަތް ނިމެންދެން ސްކޫލް ބަންދު ކުރުމަށް އަންގާފައި. އާންމު ގޮތެއްގައި މިފަދައިން ކޮންޓެކްޓް ޓްރޭސިންގ ހަދާއިރު ބަންދުވާނީ ދެ ދުވަސްވަރު." ޝައުކަތު ވިދާޅުވިއެވެ.
ލ. ފޮނަދޫން ފައްސިވި މީހުންގެ އަދަދު 4 އަށް އަރާފައިވާއިރު، މަޢުލޫމާތު ލިބިފައިވާ ގޮތުގައި ފައްސިވި މީހުންގެ ތެރޭގައި ތިން ކުޑަކުދިން ވެސް ހިމެނެއެވެ.
ފޮނަދޫ ހެލްތު ސެންޓަރ އިން "ދެން" އަށް މަޢުލޫމާތު ދެމުން ބުނެފައި ވަނީ ނެގި 4 ސާންޕަލް ފައްސިވެފައިވާ ކަމަށާއި އިތުރު ސާންޕަލެއް ނަގާފައިނުވާ ކަމަށެވެ.
