ފައުޒަންގެ ހަނދާނުގައި ސްކޫލްތަކުގައި ހިތާމައިގެ ސުކޫތެއް
ފުވައްމުލަކު ސިޓީގައި ގެނބިގެން ނިޔާވި އަހުމަދު ފައުޒަންގެ ހަނދާނުގައި ސްކޫލްތަކުގައި މިއަދު ހިތާމައިގެ ސުކޫތެއް ގެނެސްފިއެވެ.
އެޑިއުކޭޝަން މިނިސްޓްރީން ބުނީ މިދިޔަ ހޮނިހިރު ދުވަހު ނިޔާވި ފުވައްމުލަކު ސްކޫލްގެ ގްރޭޑް 10ގެ ދަރިވަރު އަހުމަދު ފައުޒަންގެ ހަނދާނުގައި، ސްކޫލްތަކުގައި މިއަދު އެއް މިނެޓްގެ ހިތާމައިގެސުކޫތެއް ގެނެސްފައިވާ ކަމަށެވެ.
ފައުޒާން ނިޔާވެފައިވަނީ ޏ. ފުވައްމުލަކު މޫދުގައި ގެނބެމުންދިޔަ ދެ ކުއްޖަކު ސަލާމަތް ކުރަން އުޅެނިކޮށް، ގެނބިގެންނެވެ. ފައުޒާން ނިޔާވުމާ ގުޅިގެން ފައުޒާންގެ ލޮބުވެތި އާއިލާއަށް،މިނިސްޓަރ އޮފް އެޑިޔުކޭޝަނާއި، މިނިސްޓްރީގެ އިސްވެރިންނާއި، އެންމެހާ މުއައްޒަފުންގެ ނަމުގައި އިޚްލާސްތެރި ތަޢުޒިޔާ ދަންނަވާފައި ވެއެވެ.
ފައުޒަން ނިޔާވުމާ ގުޅިގެން ރައީސް އިބްރާހިމް މުހައްމަދު ސޯލިހު ވެސް ވަނީ އޭނާގެ އާއިލާ އަށް ތައުޒިޔާ ފޮނުއްވާފައެވެ. އެ ހިތާމަވެރި ހާދިސާއާ ގުޅިގެން ރައީސް ސޯލިހު ކުރެއްވި ޓްވީޓެއްގައި ވިދާޅުވީ، އެ އަންހެން ކުއްޖާ ސަލާމަތް ކުރުމުގެ ތެރޭގައި ފައުޒާން ވަކިވެގެން އެ ދިޔައީ މުޅި ގައުމަށް ހިތްވަރުގަދަކަމުގެ ލާމަސީލު ނަމޫނާ ދައްކުވައިދީފައި ކަމަށެވެ.
ފައުޒާން އަކީ އެންމެނާވެސް ގުޅިގެންއުޅޭ، ސްކޫލް ދަރިވަރުންގެ ވަރަށް ގާތް އެކުވެރިއެއް ކަމަށާއި އެއީ ސްކޫލަށް ނުހަނު މުހިއްމު، އަޚުލާގު ރަނގަޅު ދަރިވަރެއް ކަމަށް އެޑިއުކޭޝަން މިނިސްޓްރީން ވަނީ ވިދާޅުވެފައެވެ.
