މާފަންނުގައި ހުރި ހޮޓަލެއްގެ ބިއްލޫރިގަނޑު ތަޅައިލައިފި

މާފަންނުގައި ހުރި ހޮޓަލެއްގެ ބިއްލޫރިގަނޑު ތަޅައިލައިފިއެވެ.

މަންޒަރު ދުށް މީހަކު “ދެން”އާ ވާހަކަދައްކަމުން ބުނެފައިވަނީ އެ ބިއްލޫރިގަނޑު ތަޅައިލީ ބަޔަކު ގަސްތުގައި ކަމަށާއި، އަދި އެތަނުގައި މަސައްކަތް ކުރާ ބިދޭސީން ކުރެ ވަޅިއެއް ހޯދުމަށް އެހުމުން ވަޅި ނުލިބުމުން އެކަމާ އައި ރުޅީގައި ބިއްލޫރިގަނޑު ތަޅައިލީ ކަމަށެވެ.

މީގެ އިތުރުން އެމީހުން ވަޅި ބޭނުންވީ އެތަނުގައި ހުރި އާންމު މީހެއް ގައިގައި ތަޅައި އަނިޔާ ކުރުމަށް ފަހު ވަޅި ޖެހުމަށް ކަމަށް ވެސް މަންޒަރު ދުށް ފަރާތަކުން “ދެން” އަށް ވަނީ މައުލޫމާތު ދީފައެވެ. އަދި މިކަމުގައި ޝާމިލު ވަނީ ކިތައް މީހުން ކަމެއް ކަށަވަރު ނުވާއިރު، ފުލުހުންގެ ކާރަށް އެކަކު އަރުވައިގެން ދިޔަ މަންޒަރު ފެނުނު ކަމަށް ވެސް މަންޒަރު ދުށް މީހާ ވަނީ ފާހަގަ ކޮށްފައެވެ.

މިކަމާ ގުޅިގެން އިތުރު މައުލޫމާތު ހޯދުމަށްޓަކައި “ދެން” އިން ވާނީ ފުލުހުންގެ މީޑިއާއަށް ވެސް ގުޅާފައެވެ. އެހެންނަމަވެސް އެބޭފުޅުންގެ ބަހެއް މިކަމަށް ނުލިބިފައިވާއިރު، އެތަނުގައި މާރާމާރީއެއް ހިނގައިގެން އުޅޭކަމުގެ ޔަގީންކަން އެތަނުގައި އެވަގުތު ހަރަކާތްތެރިވި ފުލުހަކު “ދެން” އަށް ވަނީ ކަށަވަރު ކޮށްދީފައެވެ.