އެމްޕީއެލް ސަރަޙައްދުގައި ބިއްލޫރި ޕެލެޓެއް ވެއްޓިގެން ތާށިވީ ޒުވާނާ ނިޔާވެއްޖެ

މޯލްޑިވްސް ޕޯޓްސް ލިމިޓެޑް (އެމްޕީއެލް) ސަރަޙައްދުގައި ބިއްލޫރި ޕެލެޓް ވެއްޓިގެން ތާށިވީ ޒުވާނާ ފަރުވާ ދެމުން ދަނިކޮށް ނިޔާވެއްޖެއެވެ.

Ads by Sosun Fihaara

މިހާދިސާގައި ސީރިއަަސް އަނިޔާތަކެއް ލިބިގެން ފަރުވާ ދެމުން ދިޔައީ ނ. ލަންދޫ/ ފޭރުގަސްދޮށުގޭ ޢަބްދުﷲ އާސިމް (27އ.) އަށެވެ.

އޭނާގެ މައްޗަށް ކަށުނަމާދު ކުރުން އޮތީ މިއަދުގެ މެންދުރު ނަމާދަށްފަހު، މަސްޖިދުލް ތަޢާވުން (އާސަހަރާ މިސްކިތު) ގައެވެ.

މިމަހުގެ 7 ވަނަ ދުވަހުގެ ރޭ ހިނގި ހިނގި މިހާދިސާގައި، ތާށިވެފައި ވަނިކޮށް އާސިމް ސަލާމަތް ކޮށްގެން އައިޖީއެމް އަށް ގެންގޮސް ވަގުތުން ފަރުވާ ދޭން ފެށިއެވެ.

މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވާ، ފާފަ ފުއްސަވާ ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން. އަދި މިފަދަ ހިތްދަތި ވަގުތެއްގައި ޢާއިލާއަށް ކެތްތެރިކަން ދެއްވާށިއެވެ. އާމީން

إِنَّا لِلّهِ وَإِنَّـا إِلَيْهِ رَاجِعُون

ހާދިސާއާ ގުޅިގެން އެމްޕީއެލް އިން ނެރުނު ބަޔާނެއްގައި ބުނީ މި ޙާދިސާ ހިނގަން މެދުވެރިވީ ބިއްލޫރި ޕެލެޓެއް ކޮންޓޭނަރުން ނެރުމަށް، ފޯކް ލިފްޓު ބޭނުންކޮށްގެން މަސައްކަތް ކުރުމުގެ ތެރޭގައި ކަމަށެވެ. މި ޙާދިސާގައި، ބިއްލޫރި ޕެލެޓް އަރިއަޅާލި ވަގުތު، އެ ޕެލެޓް ނެރުމަށް ހަރަކާތްތެރި ވަމުން ދިޔަ މަޖޫރިއެއް ޕެލެޓްގެ އަރިމަތީގައި ތާށިވި ކަމަށާއި އަދި ދެވަނަ މަޖޫރީއަކަށް ވެސް މި ޙާދިސާގައި އަނިޔާވެ، އިތުރު ފަރުވާ ދިނުމަށް ހޮސްޕިޓަލަށް ގެންދެވުނު ކަމަށް އެމްޕީއެލް އިން ނެރުނު ބަޔާނެއްގައި ބުނެފައި ވެއެވެ.

މި ހާދިސާ ތަހުގީގްކޮށް، މި ފަދަ ކަމެއް ތަކުރާރުވެ ނުދިއުމަށް، އެ ކުންފުނިން އަޅަންޖެހޭ ފިޔަވަޅުތައް އަޅާނެ ކަމަށް ވެސް އެމްޕީއެލް އިން ބުނެފައިވެއެވެ.