އައިންތުގެ ކާރަށް ގެއްލުންދިން ކަމަށްބުނާ މައްސަލައިގައި ދައުވާ ކޮށްފި
ޓެކްސީ ޑްރައިވަރި އައިމިނަތު ވަހީދާ (އައިންތު) ގެ ޓެކްސީ އަށް ހަމަލާދިން ކަމަށް ބުނެފައިވާ މައްސަލައިގައި ދައުވާކުރަން ޕްރޮސެކިއުޓާ ޖެނަރަލް (ޕީޖީ) އޮފީހުން ފޮނުވައިފި އެވެ.
ޕީޖީ އޮފީހުން ބުނި ގޮތުގައި އެ މައްސަލައިގައި ދައުވާކުރަން ފޮނުވާފައި ވަނީ ގ. އާފަތިސް މުހައްމަދު ހަމްދޫން އަހުމަދުގެ މައްޗަށެވެ.
ހަމްދޫން ގެ މައްޗަށް ކޮށްފައިވަނީ ދިވެހިރާއްޖޭގެ ގާނޫނުލްއުގޫބާތުގެ 220 ވަނަ މާއްދާގެ (ހ) ގެ (1) ވަނަ ނަންބަރާ ހަވާލާދީ، އެ މާއްދާގެ (ރ) ގެ 3 ވަނަ ނަންބަރުގެ ދަށުން މުދަލަށް ގެއްލުން ދިނުމުގެ ކުށުގެ ދައުވާ އެވެ.
އެނގިފައިވާ ގޮތުގައި ޕީޖީ އޮފީހުން އޭނާގެ މައްޗަށް އެ ދައުވާކުރަން ފޮނުވާފައި ވަނީ މިދިޔަ އޮކްޓޫބަރު މަހުގެ 27 ވަނަ ދުވަހުގެ 02:06 ހާއިރު، ގދ.ވާދޫ، ހެޕީ، އާމިނަތު ވަހީދާ ޓެކްސީ ކުރުމަށް ގެންގުޅޭ ކާރު އިއްޒުއްދީން މަގު، ޑްރަގް ކޯޓް ކުރިމަތީގައި ޕާކް ކޮށްފައި އޮއްވާ، އެ ޓެކްސީގެ ކުރީ ބިއްލޫރިގަނޑު (ވިންޑްސްކްރީން) އަށް ގާއުކައި އެ ބިއްލޫރިގަނޑު ތަޅާލައި، އެ ކާރަށް ގެއްލުން ދީފައިވާ ކަމަށް ބުނެއެވެ.
މިދިޔަ އަހަރުގެ އޮކްޓޯބަރު މަހުގެ 26 ވަނަ ދުވަހުގެ ރޭ، ޑްރަގް ކޯޓު ކުރިމަތީގައި އައިންތުގެ ކާރު ބާއްވާފައި އޮއްވާ، އެކާރަށް ގެއްލުން ދީފައިވާ ކަމަށް އައިންތު ބުނެފައިވެއެވެ. އަދި މިއީ އޭނާ ދުއްވާ ކާރަކަށް އެގޮތަށް ގެއްލުން ދިން ފަސްވަނަ ފަހަރު ކަމަށް ވެސް ބުނެފައިވެއެވެ.
