ޖެޓްސްކީއެއްގައި އުޅެނިކޮށް ގެއްލުނު ދެމީހުން ފެނިއްޖެ
ފުށިފަރު ރިސޯޓުން ޖެޓްސްކީ އެއްގައި ފުރައިގެން ދަނިކޮށް، ގެއްލުނު ދެމީހުން ފެނިއްޖެއެވެ.
އެމްއެންޑީއެފްގެ ތަރުޖަމާނު މޭޖަރ އިބްރާހިމް އާޒިމް ވިދާޅުވީ ގެއްލިގެން ހޯދަމުންދިޔަ ދެމީހުންނާއި ޖެޓްސްކީ 20:42 ހާއިރު ޅ. އަތޮޅުގައި އޮންނަ ކުރެއްދޫ އައިލެންޑް ރިސޯޓު ކައިރިން ފެނިފައިވާ ކަމަށެވެ.
މި ދެ މީހުން ފެނިފައި ވަނީ ކުރެއްދޫ އައިލެންޑް ރިސޯޓު ގެ ލޯންޗަކަށް ކަމަށާއި އެމީހުންގެ ހާލު ރަނގަޅު ކަމަށް ވެސް އާޒިމް ވިދާޅުވިއެވެ.
އެމީހުން ފެނުނީ ޖެޓްސްކީގެ އިންޖީނު ހުއްޓި އޮޔާ ދަނިކޮށް ކަމަށާއި އެ ދެމީހުން ކުރެއްދޫ އައިލެންޑް ރިސޯޓަށް ގެންގޮސްދީފައިވާ ކަމަށް ވެސް މައުލޫމާތު ލިބެއެވެ.
މި ދެމީހުން ދަތުރުކުރި ޖެޓްސްކީ ހުއްޓިފައި ވަނީ އިންޖީނަށް ދިމާވި މައްސަލައަކުން ކަމަށް ވެސް މައުލޫމާތު ލިބިފައިވެއެވެ.
ޖެޓްސްކީ ގައި ނިކުމެފައިވަނީ އުމުރުން 29 އަހަރުގެ އަންހެނަކާއި 24 އަހަރުގެ ފިރިހެނެކެވެ. އެއީ ފުށިފަރު ރިސޯޓުގެ ދެ މުވައްޒަފެކެވެ.
އެމީހުން ރިސޯޓުން ފުރާފައިވާ ކަމަށް މައުލޫމާތު ލިބިފައިވަނީ 17:45 ހާއިރެވެ.
Ads by STO
