ރައްޔިތުންގެ މަޖިލީހުގެ ސާޖެންޓް އެޓް އާމްސް ސަސްޕެންޑު ކޮށްފި
ރައްޔިތުންގެ މަޖިލީހުގެ ސާޖެންޓް އެޓް އާމްސް މުޙައްމަދު ޙަލީމް ވަގުތީ ގޮތުން މިއަދު ސަސްޕެންޑު ކޮށްފިއެވެ.
ރައްޔިތުންގެ މަޖިލީހުގެ ޑިރެކްޓަރ، މީޑިއާ އެންޑް ކޮމިއުނިކޭޝަން ޙަސަން ޒިޔާއު "ދެން" އަށް މައުލޫމާތު ދެއްވަމުން ވިދާޅުވީ، މަޖިލީހުގެ ސާޖެންޓް އެޓް އާމްސް ސަސްޕެންޑު ކޮށްފައިވަނީ އޭނާގެ މައްސަލައެއް މަޖިލިހުން ބަލަމުންދާތީ ކަމަށެވެ.
"މަޖިލިހުގެ ސާޖަންޓް އެޓް އާމްސް މުޙައްމަދު ޙަލީމް މިއަދު ވަނީ ސަސްޕެންޑު ކޮށްފަ. އޭނަ ސަސްޕެންޑު ކުރީ އޭނަގެ މައްސަލައެއް މަޖިލިހުން ބަލަމުންދާތީ." ޒިޔާއު ވިދާޅުވިއެވެ.
ޒިޔާއު ވިދާޅުވީ އެއީ ބަލަމުންދާ މައްސަލައަކަށްވާތީ އެމައްސަލައާ ގުޅޭގޮތުން އިތުރު މައުލޫމާތު މިވަގުތު ދެވެން ނެތް ކަމަށެވެ.
ނަވާރަވަނަ ރައްޔިތުންގެ މަޖިލީހުގެ ސަރޖެންޓް އެޓް އާމްސް ގެ މަގާމަށް މ. މިޔަލަން އަލްފާޟިލް މުޙައްމަދު ހަލީމް އައްޔަން ކުރެއްވުމަށް ފާސްކުރެއްވީ، އެކަމަށް ނެގުނު ވޯޓުގައި ބައިވެރިވެވަޑައިގެންނެވި 59 މެންބަރުންގެ އިއްތިފާޤުންނެވެ.
ރައްޔިތުންގެ މަޖިލީހުގެ ސަރޖެންޓް އެޓް އާރމްސްގެ މަޤާމަށް މުޙައްމަދު ހަލީމް ފުރަތަމަ ޢައްޔަން ކުރެއްވީ 31 އޮކްޓޫބަރު 2013 ގައެވެ. އޭގެ ކުރިން އޭނާ ވަނީ މޯލްޑިވްސް ނޭޝަނަލް ޑިފެންސް ފޯސްގައި ގިނަ ދުވަހު ޚިދުމަތް ކުރައްވާފައެވެ.
