ކޮވިޑުން ރައްކާތެރިވުމަށް މިއަދު ޖެހީ ޖުމްލަ 1،626 ވެކްސިން
ކޮވިޑް-19 އިން ރައްކާތެރިވުމަށް މިއަދު އަތޮޅުތެރެއިން 149 މީހަކަށް އަދި މާލެ ސަރަޙައްދުން 1,477 މީހުންނަށް ވެކްސިން ދީފިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމުކޮށްފައިވާ ޑޭޓާއަަށް ބަލާއިރު 1،626 މީހުންނަށް މިއަދު ކޮވިޑަށް ވެކްސިން ދީފައިވެއެެވެ. އަދި މިހާތަނަށް ރާއްޖެއިން ޖުމްލަ 3،204 މީހުންނަށް ވެކްސިން ދީފައިވެއެވެ.އެގޮތުން މާލެ ސަރަޙައްދުން މިހާތަނަށް ޖުމްލަ 2،786 މީހުންނަށް ވެކްސިން ދީފައިވާއިރު އަތޮޅުތެރެއިން މިހާތަނަށް ޖުމްލަ 418 މީހަކަށް ވަނީ ވެކްސިން ދީފައެވެ.
ރާއްޖޭގައި މިވަގުތު ދެމުންދަނީ އިންޑިއާގެ ސީރަމް އިންސްޓިޓިއުޓުން އުފައްދާފައިވާ، އަދި ރާއްޖެއަށް ހަދިޔާ ކޮށްފައިވާ އަސްޓްރާޒެނެކާ "ކޮވިޝީލްޑް" ވެކްސިނެވެ.
މިއަދު ރާއްޖެއިން ކޮވިޑަށް ފައްސި ވެފައި ވަނީ މާލެއިން 110 މީހުންނާއި، އަތޮޅުތެރެއިން 9 މީހަކާއި ހިންގަމުން އަންނަ ރިސޯޓުތަކުން 13 މީހަކާއި ހަދަމުން އަންނަ ރިސޯޓަކުން އެކަކާއި އިންޑަސްޓްރިއަލް ރަށަކުން އެކަކެވެ.
މިހާރު ރާއްޖެއިން މިބައްޔަށް ޖުމްލަ 16،410 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 14،419 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 54 އެވެ.
