މާލެ ސަަހައްދުގައި ކެންޕެއިން ޖަލްސާ ބޭއްވުމާއި ދޮރުން ދޮރަށް ތާޢީދު ހޯދަން ދިއުން މަނާ
ކޮވިޑް-19 ގެ ހާލަތުގައި ރައްކައުތެރިކަމާއެކު ލޯކަލް ކައުންސިލްތަކުގެ އިންތިޚާބު ކުރިޔަށް ގެންދިއުމުގައި ޢަމަލުކުރަންވީ ގޮތުގެ އުސޫލުގެ ދަށުން މާލެ ސަރަހައްދުގައި ކެންޕެއިން ޖަލްސާ ބޭއްވުމާއި، ތާއީދު ހޯދުމާއި، ކެމްޕޭނުގެ ހަރަކާތްތައް ކުރިޔަށް ގެންދިއުމަށް ގޭގެއަށް ޒިޔާރަތް ކުރުން މަނާ ކޮށްފިއެވެ.
ރައްޔިތުންގެ މަޖިލީހުން ލޯކަލް ކައުންސިލްގެ އިންތިހާބުގެ ހާއްސަ ޤާނޫނަށް ގެނައި އިސްލާހާއެކު، އިންތިހާބުގެ ކެމްޕޭނާއި، އަދި އިންތިހާބުގެ ކަންކަން ކުރިއަށްދާނެގޮތް ނިންމުގެ ބާރު އެޗްޕީއޭއަށް ދިނުމާއި ގުޅިގެން މިރޭ ގެޒެޓް ކުރި އުސޫލުގައި ކެމްޕޭން ޖަލްސާތައް ވަރޗުއަލްކޮށް ބޭއްވުމަށް ވަނީ ގޮވާލާފައެވެ.
އަދި އޮންލައިންކޮށް ނޫންގޮތަކަށް ކުރިއަށްގެންދާނާމަ، ކުރިއަށްގެންދަންޖެހެނީ "ކޮވިޑް-19 ގެ ހާލަތުގައި ބައްދަލުވުންތަކާއި ރަސްމިއްޔާތުތަކާއި ޙަފްލާތަކާއި ހަރަކާތްތައް ބޭއްވުމުގައި ޢަމަލުކުރަންވީ ގޮތުގެ އުސޫލު"ގެ ދަށުންނެވެ. އެ އުސޫލުގެ ދަށުން މާލެ ސަރަހައްދުގައި ޕާޓީތަކާއި ހަފްލާތަކާއި، އެހެނިހެން ހަރަކާތްތައް ކުރިއަށްގެންދިއުމަކީ މަނާ ކަމެކެވެ. މިއުސޫލާއެކު މާލޭ ސަަރަހައްދުގައި އެއްވެސް ކެންޕެއިން ހަރަކާތެއް ނުބޭއްވޭނެއެވެ.
އޭގެއިތުރުން ތާއީދު ހޯދުމަށް ދަތުރެއް ކުރާނަމަ، އެ ދަތުރުގައި ބައިވެރިވާ އެންމެން ކަރަންޓީން ވާން ޖެހެއެވެ. މިގޮތުން އަމަލު ކުރަން ޖެހެނީ، "ރާއްޖޭގައި ކޮވިޑް-19 ފެތުރުން ކޮންޓްރޯލް ކުރުމަށް އެއްތަނުން އަނެއްތަނަށް ދަތުރުކުރުމުގައި ކަރަންޓީނު ކުރުމާއި، ކަރަންޓީނު ކުރުމުގައި ޢަމަލު ކުރަންޖެހޭ ގޮތުގެ އުސޫލު" އަށެވެ. މި އުސޫލުގެ ދަށުން 10 ދުވަހަށް ކަރަންޓީން ވާން ޖެހެއެވެ.
ލޯކަލް ކައުންސިލް އިންތިޚާބު ބާއްވަން މިހާރު ތާވަލް ކޮށްފައި ވަނީ އޭޕްރީލް 10 ވަނަ ދުވަހުއެވެ.
