ވިޔަފާރި ބަނދަރު ތިލަފުއްޓަށް ބަދަލުކުރުމަކީ އިޤްތިސާދީ ކާމިޔާބެއް: ރައީސް
މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ފުރަތަމަ ފިޔަވަހި އަންނަ އަހަރުގެ ނޮވެމްބަރުގައި ނިންމައި، ހިދުމަތް ދޭން ފަށާނެ ކަމަށް ރައީސް ޑރ. މުއިއްޒު ވިދާޅުވެއްޖެއެވެ.

މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއަކީ މި ސަރުކާރުން އިގްތިސާދީ ގޮތުން އެންމެ ބޮޑު އަހައްމިއްޔަތުކަމެއް ދޭ އެއް މަސައްކަތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ސަރުކާރަށް ތިން އަހަރު ފުރުން ފާހަގަކުރުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، މާލޭގެ ކުޑަ އަދި ތޮއްޖެހިފައިވާ ބަނދަރުގެ ބަދަލުގައި، އޭގެ ހަގުނަ ބޮޑު ސަރަހައްދެއްގައި ހިދުމަތް ދޭން ފެށުމުން އިގްތިސާދަށް ބޮޑު ކުރިއެރުމެއް ލިބޭނެ ކަމަށެވެ. އަދި އަންނަ އަހަރުގެ ނޮވެމްބަރު މަހު މި މަޝްރޫއުގެ ފުރަތަމަ ފިޔަވަހި ނިންމައި ހިދުމަތް ދޭން ފެށޭނެ ކަމަށް ވެސް އެމަނިކުފާނު ހާމަކުރެއްވިއެވެ.
ބަނދަރުގެ ޖާގަ ތަނަވަސްވުމަކީ ވިޔަފާރިތަކަށް ލިބޭނެ ބޮޑު ލުޔެއްކަން ފާހަގަކުރައްވައި ރައީސް ވިދާޅުވީ، މި ބަދަލާއެކު މުދާ އެތެރެކުރުމާއި ބޭރުކުރުމުގެ މަރުހަލާތައް މިހާރަށްވުރެ ހަލުވިވެގެންދާނެ ކަމަށެވެ.
ތިލަފުށީގެ އައު ބަނދަރާ ގުޅޭގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފައި ވަނީ، މި މަޝްރޫއުގެ ދަށުން 2.3 ކިލޯމީޓަރުގެ ދިގު ކީވޯލްއެއް ތަރައްގީކުރާނެ ކަމަށެވެ. މީގެ ސަބަބުން ނޯތު ހާބަރަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ލިބޭނެ ކަމަށް އެ ކުންފުނިން ބުނެއެވެ.
އެމްޕީއެލްގެ ތަފާސްހިސާބުތަކަށް ބަލާއިރު، ނޯތު ހާބަރުގެ ހިދުމަތް ފެށިއިރު 80 ބޯޓު ބަނދަރުކުރި ނަމަވެސް، މިހާރު އެ އަދަދު ވަނީ 149އަށް އިތުރުވެފައެވެ. އަދި ކޮންމެ އަހަރަކު އެވްރެޖްކޮށް 25އާއި 34އާ ދެމެދުގެ އަދަދަކަށް ބޯޓުތައް އިތުރުވަމުންދާ ކަމަށް އެ ކުންފުނިން ފާހަގަކޮށްފައިވެއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.