ކަނޑުގެ އުޅަނދުފަހަރު ބަނުމުގައި ޗައިނާއާ ވާދަކުރުމަށް އިންޑިއާއިން ކޮރެއާގެ ބޮޑެތި ކުންފުނިތަކުގެ އެހީ ހޯދަނީ
އިންޑިއާއިން އަމާޒު ހިފާފައިވަނީ ދެކުނު ކޮރެއާގެ އެހީގައި 2047 ވަނަ އަހަރާ ހަމައަށް ދުނިޔޭގެ އެންމެ ބޮޑު 5 ޝިޕްބިލްޑިންގް ގައުމުގެ ތެރޭގައި ހިމެނުމަށެވެ.

ކަނޑުގެ އުޅަނދުފަހަރު ބަނުމުގެ ސިނާއަތުގައި ޗައިނާއަށް އޮތް ބަރޯސާ ކުޑަކުރުމަށާއި، އަމިއްލަ ގައުމުގައި މި ސިނާއަތް ފުޅާކުރުމަށްޓަކައި އިންޑިއާއިން ދެކުނު ކޮރެއާގެ އެހީތެރިކަން ހޯދަން ފަށައިފިއެވެ. މި މަޝްރޫއުގެ ދަށުން އިންޑިއާގެ ދެކުނުގެ ސިޓީއެއް ކަމަށްވާ ތޫތުކުޑީގައި 4 ބިލިއަން ޑޮލަރުގެ ބޮޑު ޝިޕްޔާޑެއް އެޅުމަށް އެޗްޑީ ހިއުންޑާއީ (HD Hyundai) އިން ވަނީ ނިންމާފައެވެ.
ދުނިޔޭގެ ކަނޑުގެ އުޅަނދުފަހަރު ބަނުމުގެ ބާޒާރުގެ 93 އިންސައްތަ ހިއްސާކުރަނީ ޗައިނާ، ކޮރެއާ އަދި ޖަޕާނުންނެވެ. އިންޑިއާގެ އަމާޒަކީ 2047 ވަނަ އަހަރާ ހަމައަށްދާއިރު މި ލިސްޓުގެ ގަދަ ފަސް ގައުމުގެ ތެރޭގައި ހިމެނުމެވެ. މިހާރު އިންޑިއާ އޮތީ މި ލިސްޓުގެ 12 ވަނައިގައެވެ. އިންޑިއާގެ ޝިޕިންގް މިނިސްޓަރު ސަރުބަނަންދާ ސޮނޮވާލް ވަނީ މިދިޔަ އޮކްޓޫބަރު މަހު ކޮރެއާއަށް ވަޑައިގެން އެ ގައުމުގެ ބޮޑެތި ކުންފުނިތަކުގެ އިސްވެރިންނާ ބައްދަލުކުރައްވާފައެވެ.
މި ދަތުރުފުޅުގައި މިނިސްޓަރު ވަނީ އެޗްޑީ ހިއުންޑާއީގެ ޗެއާމަން ޗަންގް ކީ-ސުން، ސަމްސަންގް ހެވީ އިންޑަސްޓްރީޒްގެ ސީއީއޯ ޗޯއީ ސުން-އަން އަދި ހަންވާ އޯޝަންގެ އެގްޒެކެޓިވް ވައިސް ޕްރެޒިޑެންޓް ކިމް ޗަންގް-ޔޮންގް އާ ބައްދަލުކުރައްވައި، އިންޑިއާގައި އިންވެސްޓްކުރުމަށާއި ޓެކްނޮލޮޖީ ބަދަލުކުރުމަށް އެދިވަޑައިގެންފައެވެ.
އިންޑިއާގެ ވިޔަފާރީގެ 95 އިންސައްތަ ކަނޑުމަގުން ކުރާއިރު، ބޭރުގެ އުޅަނދުފަހަރު ކުއްޔަށް ހިފުމަށް އަހަރަކު ގާތްގަނޑަކަށް 75 ބިލިއަން ޑޮލަރު ހޭދަކުރެއެވެ. ސަރުކާރުން ވަނީ މި ސިނާއަތް ކުރިއެރުވުމަށް 697.3 ބިލިއަން ރޫޕީޒް (7.4 ބިލިއަން ޑޮލަރު) ކަނޑައަޅާފައެވެ. އަދި އަމާޒަކީ އަހަރަކު 4.5 މިލިއަން ގްރޮސް ޓަނުގެ އުޅަނދު ބަނުމުގެ ގާބިލްކަން ހޯދުމެވެ.
އެޗްޑީ ހިއުންޑާއީއާއެކު ގާއިމްކުރާ ޖޮއިންޓް ވެންޗާގައި އެ ކުންފުނީގެ 60 އިންސައްތަ ހިއްސާ އޮންނާނެ ކަމަށް ބެލެވެއެވެ. މި ޝިޕްޔާޑުން އަހަރަކު 2.5 މިލިއަން ގްރޮސް ޓަނުގެ އުޅަނދު އުފެއްދޭނެއެވެ. މީގެ އިތުރުން ސަމްސަންގް ހެވީ އިންޑަސްޓްރީޒްއިން ދަނީ އިންޑިއާގެ ސްވަން ޑިފެންސްއާ ގުޅިގެން ތެޔޮ ޓޭންކަރު ބަނުމުގެ މަސައްކަތް ކުރަމުންނެވެ.
ޗައިނާއާ އެކު އޮތް ބޯޑަރުގެ މައްސަލަތަކާ ހުރެ، އިންޑިއާއިން ބޭނުންވަނީ ސްޓްރެޓީޖިކް ސިނާއަތްތަކުގައި ޗައިނާއަށް ބަރޯސާވުން ހުއްޓާލުމަށެވެ. ނަމަވެސް، މި މަޝްރޫއުތަކަށް އޮތް އެންމެ ބޮޑު ގޮންޖެހުމަކީ އިންޑިއާގެ މަސައްކަތްތެރިންގެ ހުނަރު ދަށްވުމެވެ. ކޮރެއާގައި 10-15 ގަޑިއިރުން ކުރާ މަސައްކަތް ކުރުމަށް އިންޑިއާގެ ޔާޑުތަކުގައި 150-180 ގަޑިއިރު ހޭދަވާ ކަމަށް ތަފާސްހިސާބުތަކުން ދައްކައެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.