އިންޑިއާއާއި ފިލިޕީންސާ ދެމެދު ވިޔަފާރީގެ އެއްބަސްވުމެއް ގާއިމުކުރުމުގެ މަޝްވަރާތައް އެންމެ ފަހުގެ މަރުހަލާގައި
އިންޑިއާއާއި ފިލިޕީންސާ ދެމެދު ވިޔަފާރީގެ ގުޅުން ބަދަހިކުރުމަށްޓަކައި ޚާއްސަ އިސްކަމެއްދޭ އެއްބަސްވުމެއް ގާއިމުކުރުމުގެ މަސައްކަތް ބާރުމިނުގައި ކުރިއަށްދާކަން ހާމަވެއްޖެއެވެ.

އިންޑިއާއާއި ފިލިޕީންސާ ދެމެދު އިސްކަންދޭ ވިޔަފާރީގެ އެއްބަސްވުމެއް (Preferential Trade Agreement) ގާއިމުކުރުމަށް ކުރެވެމުންދާ މަޝްވަރާތައް މިހާރު އޮތީ ވަރަށް ކުރިއަރާފައިވާ މަރުހަލާއެއްގައި ކަމަށް އިންޑިއާ ބިޒްނަސް ފޯރަމް ފިލިޕީންސްގެ ރައީސް ދިލީޕް ތިވާރީ ވިދާޅުވެއްޖެއެވެ.
އިންޑިއާގެ ބޮޑުވަޒީރު ނަރެންދުރަ މޯދީ ފިލިޕީންސްގެ މެނީލާއަށް ކުރައްވާ ދެ ދުވަހުގެ ރަސްމީ ދަތުރުފުޅުގެ ކުރިން ތިވާރީ ވިދާޅުވީ، މި އެއްބަސްވުމުގެ ދަށުން ޑިއުޓީ ކުޑަވުމުން ފިލިޕީންސްގެ ބާޒާރުގައި އިންޑިއާގެ މުދަލުގެ އަގު ހެޔޮވެ، ޗައިނާގެ މުދަލަށް އޮތް ބަރޯސާ ކުޑަވެގެންދާނެ ކަމަށެވެ. އޭނާ ވިދާޅުވީ ދެ ގައުމުގެ ޖޮއިންޓް ވޯކިންގ ގްރޫޕުން މި އެއްބަސްވުމުގެ މަސައްކަތްތައް ވަރަށް ހަލުވިކަމާއެކު ކުރިއަށްގެންދާ ކަމަށެވެ.
ތިވާރީ ފާހަގަކުރެއްވި ގޮތުގައި ވިޔަފާރީގެ ދާއިރާގައި ވާދަވެރިކަން އިތުރުވުމަކީ މުދަލުގެ އަގު ހެޔޮވެ، އޭގެ ފައިދާ ފިލިޕީންސްގެ ރައްޔިތުންނަށް ކުރާނެ ކަމެކެވެ. ތަފާސްހިސާބުތަކުން ދައްކާ ގޮތުގައި 2025-26 ވަނަ އަހަރު ދެ ގައުމުގެ ދެމެދުގައި ކުރެވުނު ވިޔަފާރީގެ އަދަދު ވަނީ 3.9 ބިލިއަން ޑޮލަރަށް އަރާފައެވެ. އަދި 2026 ވަނަ އަހަރުގެ އޭޕްރީލް އިން އޮކްޓޫބަރުގެ ނިޔަލަށް އިންޑިއާއިން ފިލިޕީންސަށް އެކްސްޕޯޓްކުރި މުދަލުގެ މިންވަރު ވަނީ 11.2 އިންސައްތަ އިތުރުވެ، 1.56 ބިލިއަން ޑޮލަރަށް އަރާފައެވެ.
ބޮޑުވަޒީރު ނަރެންދުރަ މޯދީ ފިލިޕީންސަށް ވަޑައިގަންނަވަނީ އެ ގައުމުގެ ރައީސް ފާޑިނަންޑް މާކޯސް ޖޫނިއާގެ ދައުވަތަކަށެވެ. ނޮވެމްބަރު 16 އިން 17 އަށް ކުރައްވާ މި ދަތުރުފުޅުގައި 23 ވަނަ އާސިއާން-އިންޑިއާ ސަމިޓާއި 21 ވަނަ އީސްޓް އޭޝިއާ ސަމިޓުގައި އެމަނިކުފާނު ބައިވެރިވެވަޑައިގަންނަވާނެއެވެ. މި ދެ ބޭފުޅުން ވަނީ މިދިޔަ ސެޕްޓެމްބަރު މަހު ނިއުދިއްލީގައި ބޭއްވި ބްރިކްސް ސަމިޓުގެ ހަވާސާގައި ބައްދަލުކުރައްވައި، ވިޔަފާރީގެ ގުޅުން ބަދަހިކުރުމަށް އެއްބަސްވެވަޑައިގަންނަވާފައެވެ.
މީގެ އިތުރުން، ދަނޑުވެރިކަމުގެ ޓެކްނޮލޮޖީއާއި، ފިނޭންޝަލް ޓެކްނޮލޮޖީ އަދި ތައުލީމީ ދާއިރާގެ ސްޓާޓްއަޕްތަކަށް އަމާޒުކޮށްގެން 2027 ވަނަ އަހަރުގެ މާޗް މަހު ޓެކްނޮލޮޖީ ސަމިޓެއް ބޭއްވުމަށް ވެސް އިންޑިއާ ބިޒްނަސް ފޯރަމުން ދަނީ ރާވަމުންނެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.