އަމަލުކުރީ އެޗްޕީއޭ ގައިޑްލައިނަށް، މުވައްޒިފުންގެ ފަރާތުން ކޮވިޑް ފެތުރުނު ކަމަށް ރިޕޯޓްކޮށްފައިވަނީ ޒިންމާދާރުކަން ކުޑަކޮށް:އޭވިއޭޝަން
ކޮވިޑް-19 އައްޑޫއަށް ފެތުރުނީ ޚާއްސަ ހުއްދައިގެ ދަށުން އައްޑުއަށް ދިޔަ ފަރާތަކުން ކަމަށް ރިޕޯޓް ކޮށްފައި ވާތީ، އޭވިއޭޝަން ކޮމާންޑުން އެކަން ކުށްވެރި ކޮށްފިއެވެ.
މީޑިޔާތަކަށް މިއަދު މަޢުލޫމާތު ދެމުން އައްޑޫ ސިޓީ ކައުންސިލުގެ މޭޔަރ އަބްދުﷲ ސޯދިގު (ސޯބެ) ވިދާޅުވީ، ހިތަދޫން ޕޮޒިޓީވްވި 2 މީހުންނަށް ބަލި ޖެހުނީ މާލެއިން ހާއްސަ ހުއްދައެއްގެ ދަށުން ޓްރެއިނިންގއަށް ދަތުރުކުރި މީހެއްގެ ސަބަބުން ކަމަށް ބެލެވޭ ކަމަށެވެ.
މިކަމާ ގުޅިގެން އޭވިއޭޝަން ސެކިއުރިޓީ ކޮމާންޑުން އާންމުކުރި ބަޔާނެއްގައި ބުނީ ކޮމާންޑުގެ ޓްރެއިނިންގ ޔުނިޓްގެ 2 މުވައްޒަފުން، އައްޑޫސިޓީގައި ކުރިޔަށް ގެންދިޔަ ޓްރެއިނިންގ އަކަށް، ގޮސްފައި ވަނީ 2 ފެބްރުއަރީ 2021 ވަނަ ދުވަހު ކަމަށެވެ. އަދި މި ޓްރެއިނިންގ އަށް މުވައްޒަފުން ގޮސްފައި ވާނީ ، އެޗް.ޕީ.އޭ ގެ ގައިޑްލައިންއާ އެއްގޮތަށް ޕީ.ސީ.އާރް ޓެސްޓް ހަދާ ނެގެޓިވް ނަތީޖާ ލިބުމުން ކަމަށް ވެސް އެބަޔާނުގައި ވެއެވެ.
އެބަޔާނުގައި އިތުރަށް ބުނެފައި ވަނީ، އޭވިއޭޝަން ދާއިރާގައި މަސައްކަތް ކުރާ މުވައްޒިފުންނަކީ ޤަވާއިދުން ޓްރައިން ކުރަން ޖެހޭ ބަޔަކަށް ވީިހިނދު، ކޮންމެހެން ކުރަން ޖެހޭ ޓްރައިނިންގ އެއް ފުރިހަމަ ކުރުމަށް އެ ކުންފުނީގެ މުވައްޒިފުން ދަތުުރު ކޮށްފައި ވާނީ ޒިންމާދާރު ކަމާއެކުގައި ކަމަށެވެ. އަދި ބަލި ފެތުރިފައި ވަނީ މުވައްޒިފުންގެ ފަރާތުން ކަމަށް ރިޕޯޓް ކުރުމަކީ ޒިންމާދާރުކަން ކުޑަ ކަމެއް ކަމަށް އެފަރާތުން ބުނެއެވެ.
އައްޑޫން ކޮވިޑް-19 އަށް 2 މީހުން ފައްސިވެ،އެ ސިޓީ މިވަގުތު އޮތީ މޮނިޓަރިންގގެ ހާލަތުގައެވެ. އަދި އެ ކޭސްއާ ގުޅުންހުރި އިތުރު ފަރާތްތައް ދަނީ ކޮވިޑަށް ފައްސިވަމުންނެވެ.
