ކޮވިޑް-19: ފުވައްމުލަކުގައި ސްކޫލްތައް ބަންދުކޮށް، އެއްގެއިން އަނެއް ގެޔަށް ދިޔުން މަނާކޮށްފި
ފުވައްމުލަކުގައި ސްކޫލްތައް ބަންދުކޮށް، އެއްގެއިން އަނެއް ގެޔަށް ދިޔުން މަނާ ކޮށްފިއެވެ.
ޏ. ފުވައްމުލަކު ސިޓީގައި ނެގި ރެންޑަމް ސާންޕަލްގެ ތެރެއިން ދެ މީހަކު ކޮވިޑަށް ފަައްސިވުމާ ގުޅިގެން އެ ސިޓީ ވަނީ މޮނިޓަރިންގެ ހާލަތަށް ލާފައެވެ. ފުވައްމުލަކު ހޮސްޕިޓަލުން ބުނެފައި ވަނީ އެ ސިޓީގައި ކޮވިޑް-19 ރޯގާ ފެތުރިފައިވޭތޯ ބެލުމަށް 7 ފެބްރުއަރީ 2021 ވީ އާދިއްތަ ދުވަހު ނެގުނު ރެމްޑަމް ސާމްޕަލްގެ ތެރެއިން މިހާތަނަށް ނަތީޖާ ލިބުނު ފަރާތްތަކުގެ ތެރެއިން 2 މީހަކު ކޮވިޑް-19 އަށް ފައްސިވެފައިވާ ކަމަށެވެ.
ފުވައްމުލަށް ހޮސްޕިޓަލުން ވަނީ ރައްކާތެރިކަމުގެ ފިޔަވަޅު އެޅުއްވުމަށް ނަސޭހަތްތެރިވެފައެވެ. އަދި ކޮންޓެކްޓް ޓްރޭސިން ހެދުމާއި ރައްކާތެރިކަމުގެ ގޮތުން އިތުރަށް އަޅަންޖެހޭ ފިޔަވަޅުތައް އެޅުމަށް ކަމާގުޅޭ އިދާރާތަކާއެކު މަސައްކަތް ކުރަމުންދާނެ ކަމަށް އެ ހޮސްޕިޓަލުން ހާމަކުރެއެވެ.
ސިޓީ ކައުންސިލުން މިރޭ ނެރުނު ނޫސް ބަޔާނުގައި ބުނީ، އެ ސިޓީގައި ކޮމިއުނިޓީ ސްޕްރެޑެއް އޮތްކަމަށް ލަފާ ކުރެވޭތީވެ، އެންމެހާ ރައްޔިތުންގެ ރައްކާތެރިކަމަށްޓަކައި މޮނީޓަރިން ހާލަތު އުވެންދެން ނުވަތަ ކައުންސިލުން ވަކި ގޮތެއް އަންގަންދެން މިރޭ ދަންވަރު 12:00އިން ފެށިގެން އިތުރު ފިޔަވަޅުތަކެއް އެޅުމަށް ކައުންސިލުން ނިންމާފައިވާ ކަމަށެވެ.
އަޅާފައިވާ އިތުރު ފިޔަވަޅުތައް:
- ފިހާރަތަކަށް މީހުން ވެއްދުމަށް އެޗްޕީއޭއިން ކަނޑައަޅާފައިވާ އަދަދަށްވުރެ ގިނައިން މީހުން ފިހާރަތަކަށް ނުވެއްދުން.
- އާންމު މައިދާންތަކާއި ޕާކްތައް ބަންދުކުރުން.
- ސެލޫން، ބޯކޮށާ ތަންތަން އަދި ޖިމްތައް ބަންދުކުރުން.
- ހުރިހާ ކުޅިވަރު ހަރަކާތްތައް މަނާކުރުން.
- ޕާޓީތަކާއި ހަފްލާތަކާއި ރަސްމިއްޔާތުތައް ބޭއްވުން މަނާކުރުން.
- ޓެކްސީ ހިދުމަތް ފޯރުކޮށްދިނުމުގައި އެޗްޕީއޭގެ ގައިޑްލައިނަށް އަމަލުކުރުން
