ކޮވިޑް-19: އެޗްއީއޯސީން 6 މީހަކު ފައްސިވެއްޖެ
ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ހަ މީހަކު ކޮވިޑް-19 އަށް ފައްސިވެއްޖެއެވެ.
އެޗްއީއޯސީން ކޮވިޑަށް ފައްސި ވެފައި ވަނީ އެސެންޓަރުން ހިންގަމުންދާ ދަރުބާރުގޭގައި މަސައްކަތްކުރާ ހަ މީހެކެވެ.
އެޗްއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ހަ މީހަކު ކޮވިޑަށް ފައްސިވެފައިވާކަން ވަނީ ހާމަ ކޮށްފައެވެ. އަދި އެ މީހުން ބައްޔަށް ފައްސިވުމާ ގުޅިގެން ދަރުބާރު ގޭގައި ރައްކާތެރިކަމުގެ އިތުރު ފިޔަވަަޅުތައް އަޅާފައިވާ ކަމަށް ވެސް ބުންޏެވެ.
އެ ސެންޓަރުން ފައްސިވީ ކޭސްތަކާ ގުޅިގެން ކޮންޓެކްޓްރޭސިންގެ މަސައްކަތް ކުރިއަށް ގެންގޮސް ކޮންޓެކްޓްވީ މީހުން މިހާރު ވަނީ ކަރަންޓީނު ކޮށްފައެވެ.
އެޗްއީއޯސީގެ ރަސްމީ މަސައްކަތް ހިނގަނީ ދަރުބާރުގޭގައެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައިވަނީ މާލެއިން 89 މީހުންނާއި، އަތޮޅުތެރެއިން 22 މީހަކާއި ހިންގަމުން އަންނަ ރިސޯޓުތަކުން 32 މީހަކާއި ކަނޑުމަތީ އުޅަނދުތަކުން 2 މީހެކެވެ.
މިހާރު ރާއްޖެއިން މިބައްޔަށް ޖުމްލަ 18،612 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 16،061 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 60 އެވެ.
ހޮސްޕިޓަލުތަކުގައި މިހާރު ފަރުވާ ހޯދަމުން ދަނީ 162 މީހުންނެވެ.
ރާއްޖެއިން ކޮވިޑަށް ޓެސްޓު ކުރަން މިހާރު 488،068 ސާމްޕަލް ނަގައިފައި ވެއެވެ.
Ads by STO
