ތޮއްޑޫއިން ކުޑަ ކުއްޖަކު ކޮވިޑަށް ފައްސި ވެއްޖެ
ތޮއްޑޫއިން ކުޑަ ކުއްޖަކު ކޮވިޑް-19 އަށް ފައްސި ވެއްޖެއެވެ. ފައްސިވެފައި ވަނީ ހޯމް ކަރަންޓީންގައި ހުރި ކުއްޖެކެވެ.
ތޮއްޑޫ ސިއްހީ މަރުކަޒުގެ އޮފިޝަލަކާ ހަވާލާދީ "ސަން" ނޫހުން ރިޕޯޓުކޮށްފައިވާ ގޮތުގައި އެ ރަށުން ކޮވިޑަށް ފައްސިވެފައި ވަނީ އުމުރުން ނުވަ އަހަރުގެ ކުޑަ އަންހެން ކުއްޖެއް ކަމަށެވެ.
އެ ކުއްޖާ ފައްސިވިކަން އެނގުނީ މާލެ އިން އެ ރަށަށް ގޮސް 14 ދުވަހުގެ ކަރަންޓީން ހަމަވުމުން ނެގި ސާމްޕަލް ޓެސްޓް ކުރުމުން ކަމަށް އޮފިޝަލު ވިދާޅުވެފައިވެއެވެ.
އެ ކުއްޖާއާ އެކު އިތުރު ހަތަރު މީހުން ވަނީ މާލެއިން ތޮއްޑޫއަށް ދަތުރުކޮށްފައެވެ. އެ އެންމެން ރަށުގައި ކަރަންޓީންވީ އިރު، އެ ކުއްޖާ ފިޔަވައި އެހެން އެންމެންގެ ސާމްޕަލް ވަނީ ނައްސިވެފައެވެ.
ތޮއްޑޫ އިން ކޮވިޑް ކޭސްއެއް ފެނިފައިވާއިރު، ހދ. ނޮޅިވަރަމްގައި ހޯމް ކަރަންޓީންގައި ތިބި ދެ މީހަކު ވެސް ވަނީ ކޮވިޑަށް ފައްސިވެފައެވެ.
