ބިރު ދައްކައި ފުރައްސާރަކުރި ޓޫރިޒަމް މިނިސްޓްރީގެ މުވައްޒަފަކު އިސްތިއުފާ ދީފި

ސިޓީގައިވާ ގޮތުން، އިސްތިއުފާ ދިން މުވައްޒަފަކީ މި އަހަރު ޓޫރިޒަމް މިނިސްޓްރީން މުވައްޒަފުންނަށް ދިން ތިން ސްކޮލަޝިޕްގެ ތެރެއިން އެންމެ މަތިން މާކްސް ލިބިގެން ސްކޮލަޝިޕް ލިބުނު އަދި މިނިސްޓަރުގެ ބިއުރޯގައި ވެސް މަސައްކަތްކޮށްފައިވާ މުވައްޒަފެކެވެ. އެނގިފައިވާ ގޮތުގައި އެއީ މިނިސްޓްރީގެ ސީނިއާ ޕްލޭނިން އޮފިސަރެކެވެ.

އެ ސިޓީގައި ބުނެފައިވަނީ މިނިސްޓްރީގެ ސިޔާސީ މަގާމުތަކުގައި ތިއްބެވި ބައެއް ބޭފުޅުން ވަނީ ސީދާ އަދި ނުސީދާ ގޮތުން އޭނާ އަށް ފުރައްސާރަކޮށްފައި ކަމަށެވެ. އަދިމި އަމަލުތައް ކުރިއަށްދާތާ ގިނަ ދުވަސްތަކެެއް ވެފައިވާ ކަމަށާއި ކޮވިޑް-19 އާ ގުޅިގެން އުފެއްދި ޓާސްކް ފޯސްތަކުގައި މަސައްކަތްކުރި އިރު ވެސް، އެކި ބާވަތުގެ ފުރައްސާރަކޮށްފައިވާ ކަމަށް އޭނާގެ ސިޓީގައި ބުންޏެވެ. އެކަންކަމާއި ކުރިމަތިވުމުން ބިއުރޯގެ އިސްވެރިއެއްގެ ގޮތުގައި ހުރި މުހައްމަދު ހައްސާންއާ ހިއްސާކުރުމުން އެހީތެރިވި ކަމަށް ވެސް ސިޓީގައި ބުނެފައި ވެއެވެ.

އަދި ކުރީގެ ޓޫރިޒަމް މިނިސްޓަރު އަލީ ވަހީދަށް މިކަން ހުށަހެޅުމުން، އެކަށީގެންވާ ފިޔަވަޅު އަޅާފައި ކަމަށް ވެސް އަންހެން މުވައްޒަފު ވަނީ ބުނެފަ އެވެ.

މިނިސްޓްރީ ތެރޭގައި ހިންގައިގެން ނުވާނެ ފަދަ، އަޚްލާގީ މައްސަލަތަކާ ގުޅިގެން އަލީ ވަހީދު މިނިސްޓަރު ކަމުން އިސްތިއުފާ ދެއްވުމަށް ރައީސް އިބްރާހިމް މުހައްމަދު ސޯލިހު، އެންގެވީ މިދިޔަ ބުދަ ދުވަހުއެވެ.

ނަމަވެސް މަގާމުން އިސްތިއުފާ ނުދެއްވުން ރައިސް ސޯލިހް ވަނީ އޭނާ މަގާމުން ވަކިކުރައްވާފައެވެ.

ފުލުހުން އަންނަނީ، އެނާގެ މައްޗަށް ކުރެވޭ ޖިންސީ ގޯނާގެ މައްސަލަ ތަހުގީގު ކުރަމުންނެެވެ. އެގޮތުން ރޭ ފުލުހުން ވަނީ ކޯޓު އަމުރެއްގެ ދަށުން އޭނާ ދިރިއުޅުއްވާ ގެ، މ. ފުރަހަނަ ބަލާ ފާސްކޮށްފައެވެ.