ކޮވިޑާ ގުޅިގެން އާ އުސޫލުތަކަށް 68 ޕަސެންޓް ތަނުން އަމަލުކުރޭ: ސިޓީ ކައުންސިލް
އާންމު ހިދުމަތްދޭ ތަންތަން ނިއު ނޯމަލްގެ އުސޫލުތަކަށް އަމަލު ކުރޭތޯ ބެލުމަށް ގެންދިޔަ އިންސްޕެކްޝަންގައި 1475 ތަނެއްގެ ހާލަތު ބަލައިފައިވާ ކަމަށް މާލޭ ސިޓީގެ ޑެޕިއުޓީ މޭޔަރު ޝަމާއު ޝަރީފް ވިދާޅުވި އެވެ.
އިންސްޕެކްޝަނާ ގުޅޭ މައުލޫމާތު ދެއްވަމުން ޝަމާއު ވިދާޅުވީ އެޗްޕީއޭގެ ގައިޑްލައިނާ އެއްގޮތަށް ގިނައިން ހިންގަނީ ދިވެހި މުވައްޒަފުން ތިބޭ ތަންތަން ކަމަށެވެ. ބިދޭސީ މުވައްޒަފުން ތިބޭ ތަންތަނުގެ ސާފުތާހިރު ކަމުގެ މިންގަނޑު ދަށް ކަމަށް އޭނާ ވިދާޅުވި އެވެ.
ޝަމާއު ވިދާޅުވީ އެ 1475 ތަނުގެ ތެރެއިން އެޗްޕީއޭއިން ކަނޑައަޅާފައިވާ ގައިޑްލައިންތަކާ އެއްގޮތަށް އަމަލު ކުރަނީ 1000 ތަނެއް ކަމަށެވެ. އެއީ 68 ޕަސެންޓެވެ.
ބެލި ތަންތަނުގެ ތެރޭގައި ކެއިންބުއިމުގެ ހިދުމަތް ދޭ ތަންތަނާއި ސެލޫންތަކާއި ފިހާރަތަކާއި މާރުކޭޓްތައް ހިމެނޭ ކަމަށް ޝަމާއު ވިދާޅުވި އެވެ. އޭގެ ތެރެއިން ރަށުގެ އެކި ހިސާބުތަކުގައި ހިންގާ މާރުކޭޓްތަކުގައި ސާފު ތާހިރުކަން ދަށް ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވީ ގިނަ ފިހާރަތަކުގައި ތިބި މުވައްޒަފުންނަށް ރައްކާތެރިކަމުގެ ފިޔަވަޅުތައް ރަނގަޅަށް ނޭނގޭ ކަމަށެވެ.
