އިމިގްރޭޝަންގެ ގާނޫނަށް ނަޝީދު ހުށަހެޅުއްވި އިސްލާހަކީ ރައްޔިތުންނަށް އޮތް ބިރުވެރިކަމެއް: ޝިޔާމް
އިމިގްރޭޝަން ގާނޫނަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށައެޅުއްވި އިސްލާހުތަކަކީ ރައްޔިތުންނަށް އޮތް ނުހަނު ބޮޑު ނުރައްކާތެރި ބިރުވެރިކަމެއް ކަމަށް ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހްމަދު ޝިޔާމް ވިދާޅުވެއްޖެއެވެ.
ސަރުކާރުގެ ފަރާތުން އިމިގްރޭޝަން ގާނޫނަށް ހުށައެޅި އިސްލާހުގެ ބިލް މަޖިލީހުގެ ގައުމީ ސަލާމަތާއި ހާރިޖީ ގުޅުންތަކާ ބެހޭ ކޮމިޓީން ވަނީ ފާސްކޮށްފައެވެ. ނަމަވެސް އެ ބިލް މަޖިލީހުގެ ތަޅުމަށް ހުށައެޅުމުން މަޖިލީހުގެ ރައީސް ވަނީ އިތުުރު އިސްލާހުތަކެއް އެ ބިލަށް ގެނައުމަށް ބިލް އަނބުރާ ކޮމެޓީއަށް ފޮނުވާލާފައެވެ.
މަޖިލީހުގެ ގައުމީ ސަލާމަތާއި ހާރިޖީ ގުޅުންތަކާ ކޮމިޓީ އަށް ރައީސް ނަޝީދު ހުށަހެޅުއްވީ 10 އަހަރަށް ވުރެ ދިގު މުއްދަތަކަށް ގެއެއް ކުއްޔަށް ހިފާ ބިދޭސީންނަށާއި އެއް ލައްކަ ރުފިޔާ އަށް ވުރެ ބޮޑު އިންވެސްޓްމަންޓެއް ކުރާ ބިދޭސީންނަށް ވެސް ރެސިޑެންޓް ވިސާ ދޭ ގޮތަށާއި ދިިވެއްސަކާ ކައިވެނި ކުރާ ބިދޭސީންނަށް ވެސް އެ ވިސާ ލިބޭ ގޮތަށް ބަދަލު ގެނައުމަށެވެ.
މިކަމާ ގުޅިގެން ޝިޔާމް ކުރެއްވި ޓްވީޓެއްގައި ވިދާޅުވީ ދިވެހި ރައްޔިތުންގެ އެއްމެ އަސާސީ ހައްގެއްވެސް ކަށަވަރުކޮށް ނުދީ އަވައްޓެރި ގައުމެއްގެ ނުބައި ރޭވުންތެރި ކަމެއްގެ ތެރެއިން ގާނޫނު އަސާސީއާ ހިލާފަށް ބޭރުގެ ފަރާތްތަކަށް ދާއިމީ ރައްވެހިކަން ދިނުމަކީ ސައްތައިން ސައްތަ މުސްލިމް ގައުމަކަށް އޮތް ނުހަނު ނުރައްކާތެރި ބިިރުވެރި ކަމެއް ކަމަށެވެ.
Dhivehi rayyithunnah emme asaasee haqquthah ves kashavaru koh nudhee, avatteri qaumehge nubai reyvuntherikamehge therein QA khilaafah beyruge faraaithakah dhaaimee rahvehikan dhinumee mi 100% muslim qaumah oiy nuhanu bodu nurakkatheri biruverikameh. Lobuvethi Rayyithunney heyla! pic.twitter.com/z2zTzkvDKO
— Ahmed Shiyam (@Shiyamaldives) July 17, 2020
ރައީސް ނަޝީދު ހުށައެޅުއްވި ހުށައެޅުއްވުމަށް ބަހުސް ކުރުމަށް މަޖިލީހުގެ ގައުމީ ސަލާމަތާއި ހާރިޖީ ގުޅުންތަކާ ބެހޭ ކޮމިޓީންގެ ބައްދަލްވުމެއް ވަނީ ބާއްވާފައެވެ. އެ ކޮމެޓީގައި ބައިވެރިވެވަޑައިގެންނެވި މެމްބަރުން ވަނީ އެ އިސްލާހުތަކާ ކަންބޮޑުވުން ފާޅުކޮށް ވާހަކަ ދައްކަވާފައެވެ. އޭގެ ތެރޭގައި އެމްޑީޕީގެ މެންބަރުންވެސް ހިމެނެއެވެ.
