އިދިކޮޅުގެ ބޮޑެތި ތުހުމަތުތަކެއް ޕީޖީ ޝަމީމަށް: އިންސާފުވެރިއެއް ނޫން، އިސްތިއުފާ ދޭން ޖެހޭ!
އެމްއެމްޕީއާރުސީ މައްސަލާގައި އިދިކޮޅު ޕީޕީއެމް/ޕީއެންސީ ކޯލިޝަނުން ޕްރޮސެކިއުޓަރ ޖެނެރަލް ހުސެއިން ޝަމީމަށް ބޮޑެތި ތުހުމަތުތަކެއް ކޮށްފިއެވެ.
އެމްއެމްޕީއާރްސީގެ މައްސަލައިގައި ތުހުމަތު ކުރެވޭ އެ ކުންފުނީގެ ކުރީގެ އެމްޑީ އަބްދުﷲ ޒިޔަތާއި، ކުރީގެ ނައިބު ރައީސް އަހުމަދު އަދީބާއި، މުހައްމަދު ހުސެއިން (އޮއިއްޓޭ)ގެ ވަކީލެއްގެ ގޮތުގައި ޝަމީމް މަސައްކަތް ކުރައްވާފައިވާ ކަމަށާއި، އެހެންކަމުން މިހާރު އެމްއެމްޕީއާރްސީގެ މައްސަލައިގައި ދައުލަތް ތަމްސީލު ކުރައްވާ އެންމެ އިސް ވަކީލެއްގެ ގޮތުގައި ޝަމީމް ހުންނެވުމަކީ މަސްލަހަތު ފުށޫއަރާ ކަމެއް ކަމަށް ބުނެ ބާ ކައުންސިލަށް ވަނީ މައްސަލައެއް ހުށަހަޅައިފައެވެ.
މިކަމާ ގުޅިގެން އިދިކޮޅު ކޯލިޝަނުން މިރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ޕީޖީ ޝަމީމްގެ މައްޗަށް ޖިނާއީ ތުހުމަތުތަކެއް ކުރެވޭ ކަމަށާއި، މިގޮތުން ޕީޖީ މަނީ ލޯންޑާ ކުރިކަމަށް ތުހުމަތު ކުރެވޭ މައްސަލަ ބަލާ ދިނުމަށް ގޮވާލާ ކަމަށެވެ.
މީގެ އިތުރުން އަދުރޭ ވިދާޅުވީ ޕީޖީ އާއި ދެކޮޅަށް ބާކައުންސިލްއަށް ހުށަހެޅި މައްސަލާގައި ބޮޑެތި ތުހުމަތުތައް ކުރެވޭއިރު އެމްއެމްޕީއާރުސީގެ ހުރިހާ މައްސަލައަކުން ޝަމީމް ތަނާޒުލް ވާން ޖެހޭ ކަމަށެވެ.
"ގާނޫނާ އެއްގޮތަށް މައްސަލަ ކުރިއަށް ގެންދަންޏާ ހުސެއިން ޝަމީމް އެބަ ޖެހޭ މި މުޅި މައްސަލައިއިން ތަނާޒުލް ވާން. މައްސަލައިގެ އެކެއްގެ ބައިން ތަނާޒުލްވެފައި އަހެން މީހުންގެ ބައިން ތަނާޒުލް ނުވެ ހުރުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން. މި މައްސަލައިގައި ހިމެނޭ އެކެއްގެވެސް ގާނޫނީ ވަކީލަކަށް ވުމަކީ އަޅުގަނޑުމެން ގަބޫލު ކުރާ ގޮތުގައި މުޅި މައްސަލައިގެ ވަކީލަކަށްވުން،" އަދުރޭ ވިދާޅުވިއެވެ.
އަދުރޭ ވިދާޅުވީ އެމްއެމްޕީއާރްސީއިން ބޭރުވި ކޮންމެ ޗެކެއްވެސް ސޮއި ކުރައްވާފައި ވަނީ ޒިޔަތު ކަމަށާއި ގެއްލުނު ކޮންމެ ރުފިޔާއަކީވެސް ޒިޔަތު ސޮއިކޮށްގެން ގެއްލުނު ފައިސާ ކަމަށެވެ. އެހެންކަމުން ޒިޔަތުގެ ވަކީލަކަށް، މުޅި އެމްއެމްޕީއާރްސީގެ މައްސަލައިން ތަނާޒުލް ނުވެ މަސްލަހަތު ފުށޫއެރުން ހުއްޓުވޭނެ ގޮތެއް ގަބޫލު ނުކުރެވޭ ކަމަށް އަދުރޭ ވިދާޅުވިއެވެ.
އަދުރޭ އިތުރަށް ވިދާޅުވީ ރައީސް ޔާމީންގެ މައްޗަށް ދައުވާކޮށްފައި ވަނީ މަސްލަހަތު ފުށޫ އަރާ ޕީޖީއެއް ހުރެގެން ކަމަށާއި އެއީ ވަކީލާއި މުވައްކިލާ ދެމެދު އޮންނަ ސިއްރު މައުލޫމާތު ބޭނުންކޮށްގެން ކުރި ނަހަމަ ދައުވާއެއް ކަމަށެވެ. އެހެންކަމުން ރައީސް ޔާމީންގެ ދައުވާއަކީ އުފެދުމުގައިވެސް ބާތިލު ދައުވާއެއް ކަމަށާއި، އެމަނިކުފާނު ވަގުތުން މިނިވަން ކުރަން ޖެހޭ ކަމަށް އޭނާ ވިދާޅުވިއެވެ.
