އާޒިމް އަޅުގަނޑު ލައްވާ ވަރަށް ހަޑި ކަންތައްތަކެއް ކުރުވަން މަސައްކަތް ކުރި: މަހްލޫފް
އެފްއޭއެމްގެ އިންތިހާބާ ގުޅިގެން ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަދި އެމްޑީޕީގެ ޕީޖީ ލީޑަރު ވަރަށް ހަޑި ކަންތައްތައް ކުރުވަން މަސައްކަތް ކުރައްވާ ކަމަށް ޔޫތް މިނިސްޓަރު އަހުމަދު މަހުލޫފް ތުހުމަތު ކުރައްވައިފިއެވެ.
އެފްއޭއެމުން މި މަހުގެ ދެވަނަ ދުވަހު ވަނީ އިންތިހާބީ ކޮންގްރެސް ބާއްވައި ރައީސަކަށް އަނެއްކާ ވެސް ބައްސާމް އަދީލް ޖަލީލް ހޮވާފައެވެ. އެ އިންތިހާބު ފަސް ކުރުމަށް ސަރުކާރުން އެންގި ނަމަވެސް އެފްއޭއެމްއިން އިންތިހާބު ބާއްވާފައި ވާތީ ގިނަ މައްސަލަތަކެއް ވަނީ ފެންމަތި ވެފައެވެ.
ރައްޔިތުންގެ މަޖިލިހުގެ މިއަދުގެ ޖަލްސާގައި އެފްއޭއެމްގެ އިންތިހާބު ނުހުއްޓުވި ސަބަބާ ގުޅޭ ގޮތުން ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ކުރެއްވި ސުވާލުގެ ޖަވާބުގައި މިނިސްޓަރު މަހުލޫފް ވިދާޅުވީ އެފްއޭއެމްގެ އިންތިހާބުގެ މައްސަލައިގައި އެމްޑީޕީގެ ޕީޖީ ލީޑަރު އާޒިމް ކަންތައް ކުރައްވާ ގޮތުން ވަރަށް ދެރަވާ ކަމަށާއި ސަބަބަކީ މިކަންކަން އެންމެ ރަނގަޅަށް އެނގިވަޑައިގެން ހުންނަވައި އެގޮތަށް މަސައްކަތް ކުރައްވާތީ ކަމަށެވެ.
"އަޅުގަނޑު ވަރަށް ދެރަވޭ ޕީޖީ ލީޑަރު އާޒިމް މިކަން ކުރައްވާ ގޮތުން، ހަމަ ވަރަށް ދެރަވޭ. ދެރަވާ ސަބަބަކީ އެންމެ ރަނގަޅަށް މިކަން އެނގިވަޑައިގެން ހުންނަވާ، އަޅުގަނޑު ލައްވާ ވަރަށް ހަޑި ކަންތައްތަކެއް ކުރުވަން މަސައްކަތް ކުރާތީ" މަހުލޫފް ވިދާޅުވިއެވެ.
އަދި މިކަން ސިފަކުރެވެނީ އެމްޑީޕީގެ ޕްރައިމަރީގައި ރައްޔިތުންގެ މަޖިލީހުގެ، ރައީސް މުހައްމަދު ނަޝީދަށް ވޯޓު ދެއްވަން ނިކުތުމުން ފުލުހުން އެ އިންތިހާބު ހުއްޓުވި ގޮތަށް ކަމަށް މަހުލޫފް ވިދާޅުވިއެވެ.
މަހްލޫފްގެ އެ ވާހަކަތަކާ ގުޅިގެން ރިޔާސަތުގައި އިންނެވި މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދު ވަނީ އޭނާގެ ވާހަކަތައް ހުއްޓުވައިފައެވެ. ނަޝީދު ވިދާޅުވީ، އެ ގޮތަށް މެމްބަރުންގެ ސުވާލުތަކަށް ޖަވާބު ދެއްވުމުގެ ފުރުސަތު ވަޒީރަށް ނުދެއްވޭނެ ކަމަށެވެ.
Ads by STO
