ޖާބިރު ހުށަހެޅި ގަރާރު ބަލައިގަތުމަށް ޖާބިރުވެސް ވޯޓު ނުދެއްވާ
ސިޓީކައުންސިލްތަކާއި، އަތޮޅު ކައުންސިލްތަކާއި، ރަށުކައުންސިލްތައް އުވާލުމާއި، ލޯކަލް ގަވަރމަންޓް އޮތޯރިޓީގެ ނަމުގައި އުފައްދާފައިވާ މުޢައްސަސާ އުވާލުމަށް ގޮވާލައި ކާށިދޫ ދާއިރާގެ މެމްބަރު އަބްދުﷲ ޖާބިރު ރައްޔިތުންގެ މަޖިލީހަށް ހުށަހެޅުއްވި ޤަރާރަށް ޚުދު އެމަނިކުފާނު ވެސް ވޯޓު ނުދެއްވާކަން ހާމަވެއްޖެއެވެ.
އެގަރާރު ރައްޔިތުންގެ މަޖިލީހުން ވަނީ ބަލައި ނުގަނެ ބޭރުކޮށްލާފައެވެ.
ކާށިދޫ ދާއިރާގެ މެންބަރު ހުށަހެޅުއްވި ޤަރާރު ބަލައިމަގަތުމާއިމެދު ނެގުނު ވޯޓުގައި ޤަރާރު ބަލައި ނުގަތުމަށް 60 މެމްބަރަކު ވަނީ ވޯޓްދެއްވާފައެވެ.
ޖާބިރު ހުށަހެޅުއްވި ޤަރާރުގައި ވިދާޅުވެފައިވަނީ "ކޮވިޑް19 ވައިރަސް" ގެ ސަބަބުން ރާއްޖޭގެ އެންމެހާ ސިނާޢަތްތައް މުޅިން ހުއްޓި، ރާއްޖޭގެ އިޤްތިޞާދު ފުނޑުފުނޑުވެ، ދައުލަތު ބަނގުރޫޓް ވުމާއި ދިމާއަށް މިޞްރާބު ޖަހާފައިވާކަމަށެވެ.
މިހާލަތުގައި ރާއްޖޭގެ އެންމެހާ ސިނާޢަތްތައް މުޅިން ހުއްޓި، ރާއްޖޭގެ އިޤްތިޞާދު ފުނޑުފުނޑުވެ، ދައުލަތް ބަނގްރޫޓުވުމާއި ދިމާއަށް މިޞްރާބު ޖަހާފައިވާތީ، ރާއްޖޭގެ އިޤްތިޞާދަށް ލިބުނު ފޫބައްދަން ދަތި ގެއްލުންތަކުގެ މައްޗަށް ރިޢާޔަތްކޮށް، ސަރުކާރުން ކުރަންޖެހިފައިވާ ޚަރަދުތައް ކުޑަކުރުމުގެ ފިޔަވަޅުތައް މިހިނދުން މިހިނދަށް އެޅުމަކީ މުހިންމުކަމެއްކަމުގައި ވެސް އެމްޕީ ޖާބިރު ހުށައެޅުއްވި ޤަރާރުގައި ވިދާޅުވެފައިވެއެވެ.
