ޕީއެސްއެމުން 22 މިލިއަނަށްވުރެ ގިނަ ރުފިޔާ ހޯދަން ހަ ކުންފުންޏަކުން ދައުވާ ކޮށްފި
ދައުލަތުގެ މީޑިއާ ޕީއެސްއެމްގެ މަސައްކަތްތަކެއްކޮށް ފައިސާ ނުދޭ ކަމަށް ބުނެ 22 މިލިއަނަށް ވުރެ ގިނަ ރުރިޔާ ހޯދަން ހަ ކުންފުންޏަކުން ދައުވާ ކޮށްފިއެވެ.
އެނގިފައިވާ ގޮތުގައި ޕީއެސްއެމްގެ އެމަސައްކަތްތައް ކޮށްފައިވަނީ ކުރީގެ ސަރުކާރުގައެވެ.
އޮންލައިން ނޫސް "ސަން" އިން ބުނެފައިވަނީ ޕީއެސްއެމްގެ ޓީވީ އަދި ރޭޑިޔޯ އިމާރާތުގައި ކޮށްފައި ހުރި މަސައްކަތްތަކުގެ ތެރެއިން ބައެއް މަސައްކަތްތައް ކުރުވާފައި ހުރީ އެއްވެސް އެގްރިމެންޓެއް ނުހަދާ ކަމަށާއި ކުރީ ސަރުކާރުން ކޮށްފައިވާ އެމަސައްކަތްތަކާ ގުޅޭ އެއްވެސް ލިޔެކިޔުމެއްވެސް ފެންނަން ނެތްކަން އެނގިފައިވާ ކަމަށެވެ.
އެކުންފުނިތަކަކުން މަސައްކަތްތައްކޮށް ނިންމާ، ޕީއެސްއެމް އަށް ފައިސާ ހޯދުމަށް އެދި ސިޓީ ލާފައިވާ ކަމަށާއި ނަމަވެސް އެ ކުންފުނިތަކަށްވެސް އެ މަސައްކަތް ކުރީ އެމީހުންކަން ސާބިތުކޮށްދޭނެ އެއްވެސް ލިޔެކިޔުމެއް ހުށަހެޅިފައިނުވާ ކަންވެސް ވަނީ އެނގިފައެވެ.
އެއްވެސް ހެއްކެއް ނެތި އެފައިސާ ހޯދުމަށް އެދުމުން، ކުންފުނިތަކަށް ފައިސާ ދޫކޮށްފައި ނުވާތީ އެ ހަ ކުންފުނިން ވަނީ ފައިސާ ހޯދުމަށް ސިވިލް ކޯޓަށް މައްސަލަ ހުށަހަޅާފައެވެ.
ޕީއެސްއެމްއިން ކޮރަޕްޝަންގެ ބޮޑެތި އަމަލުތަކެއް ކުރީ ސަރުކާރުގައި ހިންގާފައިވާ ކަމަށް ބުނެ އެ މައްސަލަތައް އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅިތާ އަހަރަކަށްވުރެ ގިނަ ދުވަސްވެފައިވާއިރު، އެއިން އެއްވެސް މައްސަލައެއްގެ ތަހުގީގު އަދި ނުނިމޭކަން އެކުންފުނިން ވަނީ ފާހަގަ ކޮށްފައެވެ.
