ކޮވިޑް-19: ކުޑަހުވަދޫން ނެގި ރެންޑަމް ދެ ސާމްޕަލެއް ފައްސި ވެއްޖެ
ކުޑަހުވަދޫން އިއްޔެ ނެގި ރެންޑަމް ދެ ސާމްޕަލެއް ކޮވިޑަށް ފައްސި ވެއްޖެއެވެ.
ކުޑަހުވަދޫ ކައުންސިލް ރައީސް އަހުމަދު ޝާމް ވިދާޅުވީ ރެންޑަމްކޮށް ނެގި ދެ ސާމްޕަލުން ދެ މީހަކު ފައްސި ވެފައިވާ ކަމަށާއި އެއީ އެއާޕޯޓު މުވައްޒަފުންގެ ކޮންޓެކްޓްސް ކަމުގައި ބެލެވޭ ކަމަށެވެ. މުވައްޒަފުންތަކެއް ޕޮޒިޓިވްވެ، ކުޑަހުވަދޫ މޮނިޓަރިންއަށް ލާފައި ވަނީ މާޗް މަހުގެ 17 ވަނަ ދުވަހުއެވެ. އަދި އެ ރަށުގައި އާންމުންގެ ތެރޭގައި ކޮވިޑް-19 ފެތުރެމުން އަންނަކަމަށް ހެލްތު އިމަޖަންސީ އޮޕަރޭޝަން ސެންޓަރުން ވަނީ ބުނެފައެވެ.
އެހެން ނަމަވެސް ކުޑަހުވަދޫ ކައުންސިލްގެ ރައީސް އަހްމަދު ޝާމް ވިދާޅުވީ އެރަށުގައި ކޮމިއުނިޓީ ސްޕްރެޑްއެއް އޮތް ކަމަށް ނުބެލެވޭ ކަމަށެވެ. މިހާތަނަށް އެރަށުން 1400 އެއްހައި މީހުންގެ ސާމްޕަލް ނެގިފައިވެއެވެ.
މިއާއެކު ކުޑަހުވަދޫން މިހާތަނަށް 25 މީހަކު ވަނީ މި ބައްޔަށް ފައްސި ވެފައެވެ.ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައިވަނީ މާލެއިން 91 މީހުންނާއި، އަތޮޅުތެރެއިން 52 މީހަކާއި، ހިންގަމުން އަންނަ ރިސޯޓުތަކުން 11 މީހަކާއި އިންޑަސްޓްރިއަލް އައިލެންޑުން އެކަކެވެ.
މިހާރު ރާއްޖެއިން މިބައްޔަށް ޖުމްލަ 23،403 މީހުން ފައްސި ވެފައިވެއެވެ.
Ads by STO
