އެމްޑީޕީއަށް ރައްޔިތުން ދިން ބާރުތަކާއެކު ޒިންމާތަކެއްވެސް ލިބުނުކަން ހަނދާން ކުރަން ޖެހޭ: މީކާޢީލް
އެމްޑީޕީ ސަރުކާރަށް ރައްޔިތުން ބާރުތައް ހަވާލު ކުރީ، ޒިންމާ ތަކަކާ އެކުގައި ކަމަށާއި މިއަދު އެމަންޒަރު ފެންނަމުން ނުދާތީ ލަދުގަންނަ ކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމު ވިދާޅުވެއްޖެއެވެ.
މީކާއީލް މިހެން ވިދާޅުވެފައި ވަނީ، ހެލްތު މިނިސްޓްރީން ވެންޓިލޭޓަރތައް ގަތުމުގައި ކޮރަޕްޝަން ހިމެނޭ ކަމަށް އޭސީސީން ވިދާޅުވި ނަމަވެސް އެ މައްސަލައިގައި ދައުވާ ނުކުރަން ޕްރޮސެކިއުޓަ ޖެނެރަލް (ޕީޖީ)އިން ނިންމި މައްސަލައިގައި މަޖިލިހަށް ހުށަހެޅި ކުއްލި މައްސަލަ އަށް ބަހުސް ކުރައްވަމުންނެވެ.
މީކާޢީލް މިއަދު ވިދާޅުވީ، ރައްޔިތުން އެމްޑީޕީއަށް ރައްޔިތުންގެ މަޖިލީހުގެ 65 ގޮނޑި ހަވާލު ކުރީ، ދައުލަތެއް ކުރިޔަށް ގެންދާނެ ގޮތް ކުރިޔަށް އޮތް ޖީލުތަކަށް ދައްކައިދިނުމުގެ ޒިންމާއާ އެކުގައި ކަމަށާއި ޤާނޫނު ނަގަހައްޓާ، މުއައްސަސާތައް ޖަވާބު ދާރީ ކުރުވުމުގެ ޒިންމާ ވެސް މަތި ކޮށްފައި ވާ ކަމަަށެވެ.
"65 ގޮނޑި އަޅުގަނޑުމެންނަށް ދިނީ ޒިންމާތަކަކާއެކު. ބާރުތަކެއް އެކަންޏެއް ނޫން. އެއީ އަޅުގަނޑުމެން މި ދަޢުލަތުގެ މާލިއްޔަތަށް ހުރުމަތްތެރިކަން ހިތާނެކަމުގެ ޒިންމާ. ގާނޫނު އަސާސީއަށް ހުރުމަތްތެރިކަމަށް ހިތާނެކަމުގެ ޒިންމާ" މީކާއީލް ވިދާޅުވިއެވެ.
ވެންޓިލޭޓަރުތަކުގެ މައްސަލައިގައި އޭސީސީގެ ރައީސް މަރިޔަމް ޝިއުނާގެ މައްޗަށް އިތުބާރު ނެތް ކަމަށް ފެނޭތޯ ބަލަން އެމްޑީޕީގެ ޕާލަމަންޓްރީ ގްރޫޕްގެ ބައްދަލުވުމެއް ވެސް އިއްޔެ ވަނީ ބާއްވައިފައެވެ. ނަމަވެސް ޝިއުނާ ވަކި ކުރަން ފެންނަ ކަމަށް ވޯޓް ދެއްވީ އެންމެ 13 މެންބަރުންނެވެ.
މިކަމަށް އިޝާރާތް ކުރައްވާ ވާހަކަފުޅު ދައްކަވަމުން، މީކާއީލް ވިދާޅުވީ، މިއަދު އެމްޑީޕީއަކީ ވައްކަން ކުރާ ވަގު ޕާޓީއެއްގެ ގޮތުގައި ސިފަވަމުން އަންނަ ކަމަށާއި މިކަމުން ދުރުވާން ކުރަން ޖެހޭ އެންމެ މުހިންމު އެއް ކަމަކީ އެމްޑީޕީގެ ޕާލިމެންޓްރީ ގްރޫޕްގެ މީޓިންގތައް ލައިވް ކުރުން ކަމަށެވެ.
"މި ޕާޓީ ވަގު ލޭބަލްއިން ސަލާމަތް ކުރަން ބޭނުން ވާނަމަ ކުރަންޖެހޭ މުހިންމު އެއް ކަމަކީ އަޅުގަނޑުމެންގެ ޕާޓީގެ ޕާލަމަންޓްރީ ގްރޫޕްގް މީޓިންތައް ލައިވް ކުރުން. އަޅުގަނޑު އެކަން މިއަދު ޕާލަމަންޓްރީ ގްރޫޕް ލީޑަރަށް ހުށަހަޅާނަން. މިކަންކަން އަޅުގަނޑުމެން ކުރަން ޖެހޭ." މީކާޢީލް ވިދާޅުވިއެވެ.
މީކާއީލް އިތުރަށް ވިދާޅުވީ، މިއަދު އެމްޑީޕީގެ އަސާސުތައް ނެތެމުން އަންނަ ކަމަށާއި އެ ޕާޓީއަކަށްޓަކައި ފަހުރުވެރިވަމުން އައި ޕާޓީގެ އަސާސުތައް ނެތެމުންދާ ކަމަށް ހީވާ ހީވުމަކީ ބިރުގަންނަ ކަމެއް ކަމަށެވެ.
"މިއަދު މި ވާހަކަ ދައްކާ އިރު ހަގީގަތުގައި ވެސް ކުޑަކޮށް އެބަ ބިރުގަނޭ. ބިރު ގަންނަނީ އަޅުގަނޑުގެ ޕާޓީ ސަރުކާރުގައި އޮވެ، މި ޕާލަމެންޓުގެ ސުޕަ މެޖޯރިޓީގައި އޮވެމެ، މުޅި ގައުމުގެ އެކި ގުނަންތަކުގެ މެޖޯރިޓީ ނަގައިގެން އޮވެމެ، ވައްކަމުގެ ލޭބަލް އެޅެމުން ދާތީ އަޅުގަނޑު ހަމަ އެބަ ބިރުގަނޭ" މީކާއީލް ވިދާޅުވއެވެ.
މީކާއީލްގެ އިތުރުން ރައީސް ނަޝީދު ވެސް ވަނީ މިފަދަ މޭރުމަކުން ވާހަކަފުޅު ދައްކަވާފައެވެ. އެ ގޮތުން "ވަގު ސަރުކާރާއެކު" އެމްޑީޕީ އޮންނަން ރައްޔިތުން ނޭދޭނެ ކަަމަށް އެ މަނިކުފާނު ވަނީ ވިދާޅުވެފައެވެ.
