ކޮވިޑަށް ޓެސްޓު ކުރަން ސާމްޕަލް ދިނުމަށް ފަހު އޮފީހަށް ދާ މީހުން އެބައުޅޭ: ޑރ. ނަޒްލާ

ކޮވިޑް-19 އަށް ޓެސްޓު ކުރަން ސާމްޕަލް ދިނުމަށް ފަހު އޮފީހަށް ދާ މީހުން ވެސް އެބައުޅޭ ކަމަށް ހެލްތު އިމަޖެންސީ އޮޕަރޭޝަންސް ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.

Ads by Hajj Corporation

މިރޭ ހެލްތު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ ފައްސިވާ މީހުންގެ ކޮންޓެކްޓްސް އިތުރުވަމުންދާ ކަމަށާއި އެގޮތަށް ދިމާވަނީ ނިއު ނޯމަލްގައި އަމަލު ކުރަން ޖެހޭ އުސޫލުތަކަށް ތަބާ ނުވެވޭތީ ކަމަށެވެ.

"އޮފީސްތަކުގައި އެ ބަހައްޓަން ޖެހޭ ގައިދުރުކަމާއި، ރައްކާތެރިކަމުގެ ފިޔަވަޅުތައް އަޅާ ނަމަ ކޮންޓެކްޓްސް މަދުވާނެ، އޮފީސް ތެރޭގައި މާސްކު އަޅައިގެން ދުރު ދުރުގައި ތިއްބެވިޔަސް، އެކީގައި ކޮފީއަށް ދާއިރު އެ ގައި ދިރުކަމެއް ނުފެނޭ. ބައެއް ބޭފުޅުން އެބަ ފާހަގަ ކުރެވޭ މަސް ދަތުރު ދިއުމާއި، ގެއަށް ވަރަށް ގިނަ މީހުން އައިސް ބައްދަލު ކޮށްފައި ތިބުން ކަހަލަ ކަންތައްތައް ވެސް. ބައެއް ބޭފުޅުން އަލާމާތްތައް ހުރެގެން ސާމަޕަލް ނަގާފައި އޮފީހަށް ވެސް އެބަ ވަޑައިގަނޭ." ޑރ. ނަޒްލާ ވިދާޅުވިއެވެ.

ޑރ. ނަޒަލް ވަނީ އަލާމާތްތައް ހުންނަ މީހުން އޮފީހަށާއި އެހެނިހެންވެސް ތަންތަނަށް ނުދިއުމަށް އިސްތިމާސް ކޮށްފައެވެ. އެފަދަ މީހުން ފްލޫ ކްލިނިކަށް އައިސް ސާމްޕަލް ނަގައި ޓެސްޓުގެ ނަތީޖާ ލިބެންދެން ގޭގައި މަޑު ކުރެއްވުމަށް ވެސް ޑރ. ނަޒްލާ އިލްތިމާސް ކުރެއްވިއެވެ.

މިއަދުގެ މިހާތަނަށް ކޮވިޑް-19 އަށް ފައްސިވެފައި ވަނީ 59 މީހުންނެވެ. އެޗްޕީއޭއިން މިރޭ ބުނީ ކޮވިޑަށް ފައްސިވި 59 މީހުންގެ ތެރޭގައި ހިމެނެނީ 44 ދިވެހިންނާއި ބަންގްލަދޭޝްގެ 14 މީހަކާއި އިންޑިއާ މީހެކެވެ.

މި މީހުންނާއެކު ރާއްޖެއިން ފައްސިވި އަދަދު ވަނީ 3,103 އަށް އަރާފަ އެވެ.

މިއަދު ބަލިން އެއްވެސް މީހެއް ރަނގަޅުވެފައެއް ނުވެއެވެ. މިވަގުތު ފަރުވާ ކުރަމުންދަނީ 676 މީހުންނެވެ. އައިސޮލޭޝަންގައި ތިބީ 478 މީހުންނެވެ. ކަރަންޓީންގައި މިވަގުތު އެއްވެސް މީހެއް ނެތެވެ.

ކޮވިޑްގައި ރާއްޖެއިން 15 މީހަކު ވަނީ ނިޔާވެފައެވެ.

އިތުރު ތަފްސީލު އަންނަނީ...