"މެންދުރު އޮންލައިނުން" އެހެދީ ދޮގެއް! ވަކީލުންގެ އިރުޝާދުގެ މަތިން އަޅަންޖެހޭ ފިޔަވަޅެއް އަޅާނަން!: އާޒިމާ
ސަފާރީ ރޭޕް ކޭސްގައި "މެންދުރު އޮންލައިން" އަށް މައުލޫމާތު ދިނީ ކުރީގެ ބަންޑާރަ ނައިބު އަދި ރައީސް އޮފީހުގެ ކުރީގެ ލީގަލް އެފެއާޒު މިނިސްޓަރު އައިޝަތު އާޒިމާ ޝަކޫރު ކަމަށް އެނޫހުން ބުނި ބުނުން އެކަމަނާ ދޮގު ކުރައްވައިފިއެވެ.
"ބޭރުގެ އަންހެން ކުއްޖެއް ސަފާރީ އެއްގައި ރޭޕް ކޮށްގެން އުޅޭކަމަށާއި އަދި މިވާހަކަ އެނޫހަށް ސީދާ ވިކްޓިމް ގެ ފަރާތުން ގެނެސްދޭނެ ކަމަށް ބުނެ، ވިކްޓިމްކަމަށްބުނާ ފަރާތަކުން ފޯނު މެދުވެރިކޮށް ކުޑައިރުކޮޅެއްވަންދެން ވާހަކަ ދެއްކުމަށްފަހު، ވިކްޓިމްއަށް މިވާހަކަތައް ކިޔައިދޭން ވަރަށް އުނދަނގޫވާނޭ ކަމަށްބުނެ ކަންހިނގައިދިޔަ ގޮތުގެ ތަފްސީލު މެންދުރު އޮންލައިން އަށް ދިވެހިބަހުން ކިޔައިދިނީ ކުރީގެ ބަންޑާރަ ނައިބު އާޒިމާ ޝަކޫރު" ކަމަށް އެނޫހުން ރޭގައި ނެރުނު ބަޔާނެއްގައި ބުނެފައިވެއެވެ.
މިތުހުމަތުތަކާއި ގުޅޭގޮތުން "ދެން" އަށް މައުލޫމާތު ދެއްވަމުން އާޒިމާ ވިދާޅުވީ އެކަމަނާ މެންދުރު އޮންލައިން ވެސް އަދި އެބޭރު އަންހެން ކުއްޖާވެސް ނުދަންނަ ކަމަށާއި، އެނޫހުން ހަދާފައި އެވަނީ ސީދާ ކަނޑައެޅިގެން ބޮޑު ދޮގެއް ކަަމަށެވެ.
"އެމީހުން ކުރިން ބުންޏެއް ނޫންތޯ ތިމަންނަމެން ކައިރީ ސީދާ އެއަންހެން ކުއްޖާއޭ އެވާހަކަތަށް ކިޔައިދިނީ. މިހާރު ބުނެފަ އެއިނީ އަޅުގަނޑޭ އެވާހަކަތަށް ކިޔައިދިނީ. އެކަމަކު އަޅުގަނޑު އެއަންހެން ކުއްޖާއެއް ވެސް ނުދަންނަން މެންދުރު އޮންލައިނެއް ވެސް ނުދަންނަން. މީޑިއާއިން ތިފެނުނީމަ މިއެނގުނީވެސް. އަޅުގަނޑަކަށް ހަމަ އެއްގޮތަކަށް ވެސް ނުވިސްނޭ އަޅުގަނޑުގެ ނަން މިއަށް މިއައި ގޮތެއް. ޔަގީން ކަމަކީ ނޯންނާނެކަން ވާހަކަ ދައްކާފައެއް. މެންދުރު އޮންލައިނަށް އަޅުގަނޑު މައުލޫމާތު ދިނިއްޔާ ދިން ގޮތަކާއި ވާހަކަ ދެއްކި މީހެއް ވެސް ހުންނަންވާނެ ނޫންތޯ؟" މެންދުރު އޮންލައިނަކީ ރެޖިސްޓަރ ކޮށްފައިވާ ނޫހެއް ނޫންކަން ވެސް ފާހަގަ ކުރައްވަމުން އާޒިމާ ވިދާޅުވިއެވެ.
މީގެ އިތުރުން އާޒިމާ ވިދާޅުވީ މިހާރު ބިދޭސީ އަންހެން ކުއްޖާގެ ވަކީލުންނާއި ވެސް މިކަމާއި ގުޅޭގޮތުން ވާހަކަ ދައްކަވަމުން ގެންދަވާ ކަމަށާއި ވަކީލުން ވެސް ވިދާޅުވީ މިމައްސަލައިގައި އެކަމަނާގެ ނަން އައި ގޮތެއް ނޭނގޭ ކަަމަށެވެ. އަދި އެކަމަނާގެ ވަކީލުންނާއި ވެސް މަޝްވަރާ ކުރައްވަމުން ގެންދަވާ ކަމަށް އާޒިމާ ވިދާޅުވިއެވެ.
"މިހާރު މިދަނީ އަޅުގަނޑުގެ ވަކީލުންނާއި ވެސް މިކަމާއި ގުޅޭގޮތުން މަޝްވަރާ ކުރަމުން، މިކަމާއި ގުޅިގެން ކިހިނެއްތޯ ހަދާނީ. ވަކީލުންގެ އިރުޝާދުގެ މަތިން އަޅަން ޖެހޭ ފިޔަވަޅެއް އަޅާނަން" ކުރީގެ ބަންޑާރަ ނައިބު އާޒިމާ ޝަކޫރު ވިދާޅުވެފައިވެއެވެ.
